2
1 Bungo busi banzelo bavule lwabusio lwa Yehowa, nu we Satana avule gamozi nabo. 2 Yehowa abwide Satana bunee: “Ukutuka kuni?” Satana akwide Yehowa bunee: “Nkutuka mu kutimbatimba nu kutabanga mu kisi.”
3 Yehowa amubuzizie lingo bunee: “Ndi wamonine ku mukiti wane Yobu? Takuli muntu mu kisi uli mukatizia nu musoga anga wozo; ukukua Kalaga boba nu kusomba kwaga. Ukunsindika kukukasa bwangato bwa kumwita geteli kabamba, tondo eli mukatizia kankanka.”
4 Satana amwakwide bunee: “Muntu anasiga binse buno ntakue. 5 Tondo kano kaluma ndi wababazia mubili wage nti anakuswilila.”
6 Ububo Yehowa abwide bunee: “Nakukasa we tondo ntumwite.” 7 Satana atukile lwabusio lwa Yehowa. Asambizie Yobu na byulu ku mubili unsania.
8 Yobu endile kwikala ku iyala nu kwiyagaga na luginga. 9 Mukikulu wage amwakwide bunee: “Ukikili mukatizia kankanka? Swilila Kalaga nu kukua.”
10 Tondo Yobu amwakwide bunee: “Ukutenda anga bukutenda mukikulu kikongolo. Ndi Kalaga akutusingila bisoga nti twitabizia; ndi tatuneitabizia kungwa atusingila tubebe?” Mu bitondo bibyo binsania, Yobu ntagide Kalaga na kanua kage.
Bilemba bisatu bya Yobu
11 Bilemba bisatu bya Yobu, u babano: Elifazi muTemani, nu Bildadi muSuhi, nu Zofari muNamati, bongule musagu wa tubebe tuto twamubaside. Bakundamenne nu kulongeka lugendo kwenda kumubobelezia. 12 Gababezaga beikili bulazi, bamulolile nu tabamumenyine, nu balilile. Na muntu na muntu na watile nsulu zage nu kwibongia mukungu. 13 Beikede nage musi nu kindi bindi mutubakamo, nu ta umozi watendile nage aba iyuki limozi, kubuno bamonine ku kabebe kanene kage.