Idilo lya Yobu ku Kalaga
3 “Bubo busi bunabutilwe buzimine, nu kindi kya mmane kyekile iyimi lya mwana wamulume. 4 Busi bubo bube kapilo, nu Kalaga uli mwigulu ntalole kubo, nu kyengi takibusanie. 5 Busi bubo bube na kapilo nu kilimelime kya lukuo, bukukilwe na bimpa nu musi uzibe. 6 Kindi kikyo kikukilwe na kapilo, takiganzwe mu bindi bya myaka, aba takiganzwe mu myezi. 7 Kindi kikyo takikitwe mu kampa, nu mbogimbogi tazibe mukyo. 8 Babo bakuswilila baswilile busi bubo, babo bavwama kumana Leviatani. 9 Lukenikeni lwa nindunindu talusane, kindi kikyo takibe ku busi. 10 Kiswililwe kindi kikyo kubuno takyagizizie nda za mmane kumbuta, nu takyabisile mbabazio nu tubebe twane.
11 Kubuni nsyakwilide munda za mmane, nu nkungu zinabutilwe? 12 Kubuni kwandelile mmane, nu kummomia? 13 Songo nakule mu nkungu zezo, songo kano kaluma nili na bubobelelo, nalekanaga, songo nomunwa, 14 gamozi na bakota nu basunguzi ba kisi, beiyobakide biziki bya kumunwa, 15 gamozi na bana ba bakota babezaga na olo, beizazizie mazumba mabo na feza. 16 Songo iyimi lyane linutukaga, ninabede anga kazua katamonine ku kyengi. 17 Mu nsinda, bantu balekela bubi bwabo, nu bakiti bakutwa bomunwa. 18 Bakandwa beli bansania na bubobelelo, nu tabakungwa ku iyuki ikali lya mulangi. 19 Bakeke nu banene beliko, nu bakobe bakandulwa ku bakota babo. p 20 Kubuni mukukasa kyengi ku wozo uli na kabebe, nu kalamo ku babo bakulila. 21 Bakutunda lukuo tondo talukumoneka, nu bakulonda kutunda bikulo byabiswa. 22 Nazi wabogeboge, nu kuba na kyelele ndi amona ku nsinda? 23 Kubuni muntu akaswa kyengi nu ntakumona nzila, nu Kalaga amutimbia na mukolo? 24 Mizo zikuvwa kundi anga idia lyane, nu mitongo zane zikugela anga mazi. 25 Kikyo kinkukua boba kyambasile, nu kikyo kikunitia boba kyamvwilide. 26 Nsili na kyelele, aba bubobelelo, aba kumunwa, tondo tubebe tukumbasila.”