Elifasi akuzugila Yobu
4
1 Elifazi muTemani, atendile bunee: 2 “Ndi muntu ageleka kutenda nobe, ndi unongoa? Tondo nazi uneizugila buno ntatende?
3 Wigisizie bango beingi, nu walindizie maboko matamba. 4 Moki mobe malindizie wozo wagoa, nu kulindia mazu matamba. 5 Tondo kano kaluma kabebe kakuvwila, nu watamba, nu kakubasila, nu wazangibwazangibwa nunse. 6 Ndi mukukua Kalaga boba tamuli kilemanizio kyobe? Ndi ntuli na kilemanizio mu misako zobe misoga?
7 Ububo kengela ndi wizi muntu wisanana waziminne? Aaba nkungu nkizi zazikizibwe bantu basoga? 8 Anga bunamonine babo bakukita bubi, bakamona bubi anga bukutubula bantu bibayikile. 9 Muuza wa Kalaga ukubazimizia, nu bongoa bwage bukubazikya. 10 Kuzuga kwa kimbwe n'iyuki lyage ikali lyasila, nu meinyo ma byana bya kimbwe makakuka. 11 Kimbwe kikulu kikukua mu kwida nyama, nu byana byazo nti byabalangana.
12 Kitondo kimozi kinatendilwe mu kakungu, nu nungule ku kawewe mu kutuzi kwane. 13 Ku nkungu zili bantu ku tulo tubibu, nakesizie na ndozi. 14 Nasaliminne nazo nu nabede na boba, nu matuzi mane magiliminne. 15 Kilimelime kyantingile ku meiso, nu nzwili zane zakinkile. 16 Namonine ku kisusania kya muntu, tondo nsyamenyininne kilungi kyage, kwabezaga kibibi, nu mu kibibi nungule ku iyuki ikeke. 17 Lyatendile bunee: ‘Ndi muntu uli mukuzi anaba wisanana kutinga Kalaga? Ndi kibumbwa kinasililila kutinga mubumbi wakyo?’
18 Ndi Kalaga ntakulemanina bakiti bage, akusongela banzelo bage na bukongolo. 19 Buni bwabe babo bakwikala na mubili wa mukungu, nu ukubunguka anga kagembe. 20 Gasamba nindunindu nu igolo zazikibwa, zazimina tazamoneke lingo ku milyalya. 21 Mizigi za kalamo kabo zatikibwa, nu bakukua anga bwakua beteli na menge.”