Elifasi eki atenda
5
1 Nu atendile lingo bunee: “Mana kano kaluma, ndi kuli wakwitabizie? Nazi ku basililila wakugalukile? 2 Bongoa bwa kikongolo bukumwita, nu lugi lukwita uteli na menge. 3 Namonine ku kikongolo kyalindibwa, nu kitangalabesi naswilide kiziki kyage. 4 Bana bage beli bulazi na lonio, ububo bakukindwa ku milondo, nu takuli mukasia. 5 Kubuno ukukua na nzala akulia matubulo mabo, akumatikya munkatini mwa mikele, nu beibi bakwiba bikulo byabo. 6 Kabebe takakutuka ku mukungu, nu mbabazio tazikwasa munsi. 7 Tondo muntu akubutwa buno abe na tubebe, anga bukulenga nsase za keiya mu mpena. 8 Kundi ninalondile Kalaga, nu ninabikide Kalaga bitondo byane. 9 Akukita bitondo binene bitanamenywa, nu miganogano zitanaganzwa. 10 Akulokya mbula ku kisi, nu akusinga mazi ku masoa. 11 Akusakika babo bakwisigulizia, nu akubibya babo beli na kabebe. 12 Akukabya nango za bengelezi, buno tabazindilizie bitondo byabo. 13 Akukinda beiya menge ku menge mabo, nu nango za babi zikukua yiliyili. 14 Mu musi bakukulumana na kapilo, ku makuluka bakubabatababata anga mu kindi. 15 Bubo Kalaga akulanga basosu na beiti babo, nu kubonia ku maboko ma beiya magala. 16 Ububo muzambi akulemanina, nu kanua ka mwiya bwagi kakandwa.
17 Mbogimbogi ku wozo wasungulwa na Kalaga, bubo ntusombe lusungu lwa Kalaga wa Mayombo. 18 Akwita kyulu nu kukilanda, akukibanga nu kukyonia na kuboko kwage. 19 Akakwonia ku tubebe mutuba, nu mu tubebe mutubakamo bubi tabwakubasile. 20 Mu nkungu za nzala akakwonia ku lukuo, nu mu bita akwonia ku nganda. 21 Walangwe ku nsungio za buza, aba ntwakue boba ku bwiti bukukubasila. 22 Waseke ku bwiti nu ku nzala, ntwakue nyama za kisi boba. 23 Masoa mobe tamabe na makozi, nu bituganwa byobe byabe na bubobelelo gamozi nobe. 24 Nu wamenye buno numba zobe zili na bubobelelo, bubo ku bituganwa byobe takwazimine kyampa. 25 Nu wamenye buno ibuta lyobe lyabe lyingi, nu kibuti kyobe kyabe anga bulambalamba ku bwingi. 26 Ukeingila mu nsinda mu bukungu bwobe, anga bwela mbuto mu nkungu zazo.
27 Bibyo binsania twabimenyine, u bubo, buli busoga kungwilila nu kumenya buno ube na mutali.”