Iyakulo lya Yobu ku Elifasi
6
1 Nu Yobu amwakwide bunee: 2 “Songo mbabazio zane zinalindikilwe, nu tubebe twane kulindikwa ga kilindiko. 3 Songo zinabede na buzitu kutinga misege za kitatenge, ntuganegane ndi nkwakula lubilo. 4 Kalaga wa Mayombo akunsumita na misungu, nu lulengo lwazo lukuntaba kunsania mu mubili, bingo bikukita Kalaga wa magala kundi bikunitia boba. 5 Mpunda za mu kalula, ndi zikulilaga geli n'idia lyage? Aba ngombe, ndi analila geli n'idia lyage? 6 Ndi muntu analia idia lili ngigi geteli munkange? Aba ndi byenga by'iyungu byili na nse? 7 Mutima wane tagukuswagibwa nabyo, byili anga bisazi kundi. 8 Ganankasile Kalaga anga bunkusega, buno anakitile anga buli lutundo lwane. 9 Buno Kalaga anatikizye kuboko kwage kundi, buno anite. 10 Ububo ninabobelezizibwe nu ninabogilebogile mu mbabazio, kubuno nsyatunine wozo Wasililila mu kimozi. 11 Ndi nili na magala makizi ma kulama? Kilemanizio kyane kili kikizi? Kili lukuo tugu. 12 Ndi magala mane meli anga m'ikozi, aba mubili wane guli anga nsubi? 13 Ndi nsili na bukasia mundi? Nu menge masoga, ndi tameli mundi?
14 Wozo uteli na kyombo ku munyage, nti nteli na boba ku Kalaga wa magala. 15 Mibuto zane zikunililika anga tugezi twa mazi ma miduko, nu kumbusa nti twakama. 16 Mazi ma gantata ga mwiduko makukandana anga lubula, nu tamakugela. 17 Mu nkungu za muzuzo lukunyenguka, nu mazi makugela, kumbusa nti makama. 18 Bakunzia bakwendaga na ngamia zabo batuka mu nzila, nu kulonda tugezi twa mazi nu kuzimina. 19 Bakunzia ba ku Tema bakulonda, nu benzi ba ku Seba bakutulemanina. 20 Bakule na nsoni, kubuno kilemanizio kyabo kyakua. Babasile ko, nu bazangilezangile. 21 Inyuwe tamuli na kampa, kubuno mukumona ku kalolesio nu mukukua boba. 22 Ndi nakusegile kunkasa kena? Aba kunkasa nkaso za lumbisombiso na bikulo byobe? 23 Aba kunonia ku beiti bane, aba kunkulula ku maboko ma basombi?
24 Nnigisie, nu nikale kibibi, nu ndolesie bwagi bwane. 25 Moki meisanana meli na magala, tondo myango zobe zili bulia. 26 Kubuni ukutunda kuzugila moki mane? Moki ma wozo uteli na kilemanizio meli anga lumpumpu. 27 Ukwesa nkubi ku mbale, nu ukugabula kilemba kyobe. 28 Kano kaluma ndolazi, kubuno lebelebe nsikweka buza lwabusio lweinyu. 29 Kengela tanga ntusese mulondo wane buteisanana, ee, kengela lingo kitondo kyobe kili kisanana. 30 Ndi mukukengela buno lulami lwane lukweka buza? Ndi lulami lwane talunasonda idia lisoga nu libi?”