Masego ma Yobu ku Kalaga ku kabamba ka kabebe
7
1 Nu atendile lingo bunee: “Ndi takuli nkungu za mulimo mubibu ku muntu ga kisi? Nu bindi byage bili anga bindi bya mukiti wa mulimo? 2 Eli anga mukiti ukutunda mpololo, nu anga mukiti ukulindila kuligwa lukalilo lwage. 3 Mu myezi mingi nili na nsungio, nu kindi na kindi nili na mbabazio. 4 Kungwa niyombeka nkwibuzia gani gakele busi buno niyuke, kubuno nakutwa na kwigalukyagalukya ga mugu aaba nu kukya kwa busi. 5 Mubili wane wiyala na byulu byili na mikuso nu mukungu, nu ndi kibambu kyatuka nti bwina bwabasa lingo. 6 Bindi byane bikutinga anga mwizo, nu bikukua geteli kilemanizio. 7 Ee Kalaga, kengela buno kalamo kane keli anga lumpumpu, nu meiso mane tamakumona busoga lingo. 8 Wozo ukummona ntammoneko lingo, nu meiso mobe mandole, tondo nne nazimine, 9 Anga bukuzimina kimpa, u bubo buli muntu wakua; ntasubye lingo. 10 Ntakasubya lingo mu numba zage, nu ntakamenywa lingo mu kiziki kyage.
11 Ku bubo nsikale kibibi, mutima wane wiyala na bongoa nu lubaba, natunganana kutenda mu kabebe ka mutima wane. 12 Kubuni wankanda? Ndi nili kibumbwa kinene kya mu kitatenge? 13 Ndi natenda bunee: ‘Mugu wane wambobelezia, nu tulo tukunumuzia ku mbabazio.’ 14 Nti ukunitia boba mu ndozi, nu ukungilimizia na tulolesio. 15 Ninasombola kukamwa, kutinga kulama mu mubili wono wa mbabazio. 16 Nkusomba kalamo kane, nsikutunda kulama, nsige kubuno bindi byane bili bulia.
17 Muntu eli kikizi? Buno umukengele nu kumutunda. 18 Ukumulola nindunindu na nindunindu, nu kumulindika nkungu insania. 19 Nkungu nkizi ziwasige kundola, buno nimone nkungu za kumena matazi? 20 Ndi nagile? Ee Uwe ukulolaga bantu, nakukitide kikizi? Kubuni ukumbika ku kiziki kyobe kya busongozia? Wanekya muzigo muzitu. 21 Kubuni ntukusigilila mibi zane, nu kutikya bwagi bwane? Kubuno ku nkungu nkeke nkwiyombeka mu nsinda, wandonde nu nsyamoneke ko.”