Iyakulo lya Bildadi
8
1 Bildadi muSuhi akwide nu atendile bunee: 2 “Aaba nu nkungu nkizi ukutendatenda tugu? Nu moki mobe mabe anga lumpumpu lukali? 3 Ndi Kalaga anagaluka mu bulili? Aba ndi anasiga bwisanana? 4 Ndi bana bobe bamulume bagide Kalaga, nti abasungizie ku kabamba kabo. 5 Tondo kano kaluma, londa Kalaga, nu kusega ku Mwiya Mayombo. 6 Ndi uli wasililila nu wa bulili, nti Kalaga azanzuke kukukasia nu kukasa numba zobe mponga. 7 Aba ndi mu kulinga bikulo byobe byabezaga bikeke, nti Kalaga akutalikile byingi kutinga. 8 Kengela ku menge ma bakulu ba wakalazi, nu iyigisie bitondo byamenyininne batateiswe. 9 Kalamo keitu keli keigi, nu tatwizi kena, kubuno bindi byeitu mu kisi bili anga kilimelime. 10 Igisibwa na beiya menge ba wakalazi, nu ungwilila bubakutenda.
11 Ndi nsolu zinasa geteli mazi? Ndi nsekenseke zinamoneka geteli kiziba? 12 Ndi zikili mbisi nu mazi makama, zasasie kuoma kutinga bingo bisugu binsania. 13 Ububo buli nzila za babo bateizi Kalaga, kilemanizio kyage kyasile yiliyili kubuno tabakukatizia Kalaga. 14 Kilemanizio kyage kyasile nunsania, nu bukatizio bwage buli anga lukilakila lw'iyululu. 15 Ndi egamina ku lukilakila talunamulanga, ndi eikatilizia kulo talunamukasia. 16 Akususania muti mubisi mu musi, nu anga ntabi za muti zikugandaganda mu isoa lyage. 17 Mizi zago zikulimbana mu makozi, nu tazikumona bisogo. 18 Tondo ndi wasindwa mu kiziki kyago, nti kinagunana nu kutenda bunee: ‘Nsyakumonineko.’ 19 Bubo u buli mbogimbogi za nzila zage, nu bango banabutwa mu kiziki kyabo.