YOBU 9

Kwakula kwa Yobu ku Bildadi

1 Nu Yobu akwide Bildadi bunee: 2 “Lebelebe nizi bubo buwatenda buligo. Buni buneisanana muntu lwabusio lwa Kalaga? 3 Ndi muntu akwenda nage myango, ntanavwama kumwakula lubuzio lumozi munkatini mwa kanunu. 4 Ku Kalaga kuli menge mansania nu magala mansania; nazi wamulwanizie nu kumukinda?

5 Ukwigia miduko nu tazikumenya, kuzitulungula mu bongoa bwage. 6 Kalaga akusinga kaningini kutengiatengia kisi, nu mango makyo makugilimina. 7 Kalaga akuvwama kukakizia musi buno tagubase, nu ntabasia nkeninkeni. 8 Kalaga wenyene u wanzile meigulu, nu kunyanta gantata bimpumi bya kitatenge. 9 Kalaga abumbile bibombo bya nkeninkeni, u Dubu, nu Ba Mubinga na Mboa, nu Kilimia, nu ingo nkeninkeni za ku lulenge lwa kwidume. 10 Kalaga akukita bitondo binene bitanalondwa, nu migeleko zage tazinaganzwa.

11 Kungwa atinga bwigi na nne nsikumumonako, nu ndi akwenda nsikumumenyinina. 12 Akukata byakutunda, nu nazi unamuzugila? Nazi unamubuzia: ‘Kyukukita?’ 13 Kalaga ntakugalukya bongoa bwage, nu bakasia ba Rahabu bagusibwa gansi kunsi kwage.

14 Buni buninakula Kalaga? Moki makizi manasombole? 15 Aba ndi nisanana nsinamwakula kena, eli ngatu zane; ninamusega kyombo. 16 Ndi nkumumana nti ananitabila, nu nsikukatizia buno anitabizia iyuki lyane. 17 Kubuno Kalaga ambungwide na kisoa kinene, nu kuntalikila byulu geteli kabamba. 18 Ntakunkasa bwa kwiza, nu mutima wane wiyala na kabebe. 19 Ndi kili kitondo kya magala, nti eli na magala mansania. Ndi kitondo kya kwatula milondo, nazi unasombola busi bwane? 20 Ndi nili wisanana, kanua kane kakumbingia, nu ndi nili wasililila, nti Kalaga akundongekela, buno kalamo kane keli kabi.

21 Tondo ndi nili wasililila, nne nsizi, nkumona buno kalamo kane keli kabi. 22 Binsania bili bumozi, ububo nkutenda bunee: ‘Akuzikya beisanana gamozi na babi.’ 23 Gakubabasila lukuo kitangalabesi, Kalaga akuseka mbabazio za beisanana. 24 Kalaga akubika kisi mu maboko ma beiya bwagi, akuziba meiso ma ngatu. Nazi wakitile babo ndi ta Kalaga?

25 Bindi byane bikutinga lubilo anga muntu ukusasia lubilo, ta kimozi kili na mbogimbogi. 26 Bindi byane bikusasia anga bwato bukugela lubilo mu luuzi, nu anga ndiu zikuvwa kukata nyama. 27 Ndi nkutenda bunee: ‘Nkwibilila tubebe twane, nu kugalukya malanga ma kabebe, nu kuba na mbogimbogi,’ 28 Nkugilimina mu mbabazio zane insania, kubuno nizi Kalaga ntaneibilila buno nili mwagi. 29 Ndi nasungibwe, kubuni nkwikutia buliabulia. 30 Ndi noga na mazi menga, aba koga ku maboko na sabuni, 31 Aba nu bubo wanise mu nsinda, nu nsulu zane zo zenyene zansombe.

32 Songo Kalaga eli muntu, songo ninamwakula, buno twende ku ngatu kusesa mulondo weitu. 33 Takuli mukulumania gatusamba, wa kubika maboko kutuli iswe babili. 34 Atikye kasusula kage kundi, nu boba tabwavwe kundi! 35 Nu natende geteli kumukua boba, kubuno nizi nsili anga bubo ku meiso mane.”