Kulila kwa Yobu mu tubebe twage
10
1 Nu atendile lingo bunee: “Nakutwa na kalamo kane, nu nsyasile kulila kwane, natende ku kabebe ka mutima wane. 2 Nkulila ku Kalaga bunee: ‘Ntunsungie, ndolesie katati kane tanga. 3 Ndi buli busoga kusungia bantu bobe anga bubo? Nu kusomba babo beli mulimo wa maboko mobe, nu kusanizia nango za babi? 4 Ndi uli na meiso ma mubili, nu kumona anga bukumona bantu? 5 Ndi bindi byobe bili anga bya muntu ukukuaga? Ndi myaka zobe zili anga zabo? 6 Buno ukulonda bwagi bwane, nu kusa kwane kunsania? 7 Wizi nsili na katati, tondo ta umozi unanonia ku maboko mobe. 8 Maboko mobe mambumbile nu kumbika mu lukita lwane, tondo kano kaluma makumbigia. 9 Uwe Kalaga, u wambumbile anga bukubumbwa idega, kano kaluma wambigia nu kunsubya ku mukungu. 10 Ndi ntwasongolede anga mabele, nu kungagia anga mabele magaga. 11 Wakulumanizie mubili wane na makwa nu ngiginyo, nu wakukide makwa na misuna nu kikoba. 12 Wankasile kalamo nu kyelamo kyobe, nu wandangile busoga bindi binsania.
13 Tondo ukulanga kakungu mu mutima wobe, nu nizi buno bitondo bibino bili gamozi nobe. 14 Ndi naga nti ukundola, aba ntwansigilile mu bwagi bwane bwampa. 15 Kabebe kundi ndi naga, ndi nili wisanana nsineimika itoe lyane, niyala na nsoni ganili mu mbabazio. 16 Ndi nisakika, nti wanyanga anga kimbwe, nu lingo ukwidolesia kundi kuba wa miganogano. 17 Wambikila lingo balongeki, nu kutalikila bongoa bwobe kundi, n'iyombo n'iyombo lyobe lili gamozi na nne kankanka. 18 Ee, kubuni kuwantikizye munda za mmane? Songo nakule, takuli unammonineko.
19 Ganinatukile munda za mmane nu kwenda mu nsinda, songo busoga nsinabede muntu. 20 Ndi bindi tabili bikeke? Nsige buno nibobelele kakeke, 21 lwabusio nsyenda ku kisi kinsyasubye mukyo, aba ku kisi kya kapilo nu kilimelime kya lukuo. 22 U kisi kya kapilo kanene, kiyala na kilimelime kya lukuo, nu mulubu, nu kyengi kyakyo kili kapilo.”’