Iyakulo lya Zofari
11
1 Kumbusa Zofari muNamati akwide bunee: 2 “Aba ku bwingi bwa kutenda kwa muntu tabunakulwa, nu kutendatenda kwa muntu kunaganzwa bulili? 3 Ndi ku kabamba ka kwiganuna kobe tuneikala kibibi? Nu nkungu ziukwililika, ndi takuli muntu unakwitia na nsoni? 4 Kubuno watendile bunee: ‘Meigisia mane meli masoga; nu nne nili musoga lwabusio lwa Kalaga.’ 5 Songo Kalaga anakwakula, nu kulimbula kanua kage kukwakula, 6 buno anakulolesia kakungu ka menge, kubuno namo wakata menge masoga nunse. Menya buno Kalaga akusungia kyindi kya bwagi bwobe tugu. 7 Ndi unavwama kulonda kakungu ka Kalaga? Aba kumenyinina kusililila kwa Mwiya Mayombo? 8 Bili byasakama nunse, uwe unavwama kukita kikizi? Bili munsi kutinga nsinda, tondo uwe unavwama kumenya kikizi? 9 Kilindiko kya bitondo bya Kalaga kili kinene kutinga bulazi bwa kisi, nu bungulu bwa kitatenge. 10 Ndi Kalaga akukanda nzila za muntu, aba kumukata nu kumusungia, nazi unavwama kumunania? 11 Kalaga akumenya bengelezi; nu lingo akumona bubi. Aba ntabulonda? 12 Kikongolo ntanaba na menge, aba mpunda za mu lubanda tazinabuta muntu.
13 Ndi ukukokomezia mutima wobe, nu kulambya maboko mobe kweli; 14 ndi bwagi buli ku maboko mobe, ubutikye nunse, aba ntwitabizie bwagi kwikala mu numba zobe. 15 Nti walole kwigulu geteli boba, ububo wabe na magala geteli kukua boba. 16 Kubuno wibilile tubebe twobe, nu watukengele anga mazi makugela. 17 Kalamo kobe kasane kutinga musi wa makuluka, nu kapilo kakaba anga nindunindu. 18 Wabe na bubobelelo, kubuno kuli kilemanizio, nu wamone kumunwa kwa bubobelelo. 19 Wiyombeke gansi aba takuli wakukwitia boba, lebelebe beingi balonde mponga zobe. 20 Tondo meiso ma beiya bwagi mazibe, nu bo tabamone nzila za kutina, nu kilemanizio kyabo kili kukua tugu.”