Yobu akwakula kukandika kwa bilemba byage
12
1 Nu Yobu abakwide nu atendile bunee: 2 “Lebelebe muli bantu banene, nu menge makue gamozi n'inyu. 3 Tondo nili na menge meigezye na meinyu, nsili kunsi kweinyu; lebelebe, nazi utakumenya bitondo bibino? 4 Nili anga muntu wakusekwa na bilemba byage, nne muntu wamanine Kalaga nu anakwide, u muntu wisanana geteli katati nu asekwa nu kwililikwa. 5 Kabebe takeli kena ku makengelo ma babo beli na busoga, keli kayikayika ku babo beli bwigi na kugoa. 6 Numba za hema za banyagi zili na mutali, nu babo ba kongia Kalaga bakwikalaga mu bubobelelo; nu mu maboko mabo, Kalaga akubakasa byingi. 7 Tondo kano kaluma buzia nyama, nu zo zakwigisie, nu tuzoni twa mu mpelela, nu to twakusambalile. 8 Aba tenda ku kisi, nukyo kyakwigisie, nu ku byena bya kitatenge, nubyo byakwigisie. 9 Nazi uteizi ku babo bansania, buno Yehowa u wabumbile na maboko mage? 10 Mu maboko ma Kalaga muli kalamo ka bibumbwa byage, nu kwiza kwa bantu bansania. 11 Anga ndami zikusonda idia, ububo matuzi makungwilila moki. 12 Bakulu beli na menge mu kulama bindi byingi, bakumenya bitondo.
13 Kalaga eli na menge nu bwangato, nu eli na bumenyinino nu magala ma kukita. 14 Ndi Kalaga asambula, takuli unavwama kobaka lingo. Ndi Kalaga akanda muntu, takuli unavwama kumukandula lingo. 15 Ndi Kalaga ntalokya mbula nti kisi kyakama, nu ndi alokya mbula ningi nti kisi kyasimuka.
16 Kalaga eli na magala nu menge, mwengelezi nu mwengelelwa beli bage. 17 Akubigia menge ma bakota, nu akubika ngatu bikongolo. 18 Akukandula babo bakandwa na bakota, nu kukanda bibunda bya bakota na muzigi. 19 Akwenzia basankoga na magulu bwasi, nu kugalukya bwangato. 20 Akukita buno bakulemaninua babe tuluma, nu akutikya bumenyinino ku bakulu. 21 Akunyegia banene, nu kutikya magala ma mapuka.
22 Akulolesia kakungu ka mu kapilo, nu akusania kyengi mu kilimelime kya lukuo. 23 Akutalikila bilongo nu kubizikya, nu kutalikila bilongo nu kubisondelezia bulazi. 24 Akuzangiazangia mitima za bakota ba kisi, kutimbatimba mu kalula kuteli nzila. 25 Bakubabata mu kapilo geteli kyengi, nu kubungabunga anga wakatwa na maku.”