Yobu akutunda kutenda na Kalaga
13
1 Nu atendile lingo bunee: “Namonine ku bibyo binsania, nu kungwa kubyo nu kubimenyinina. 2 Bubo buwizi nibwizi, lingo nsili kunsi kwobe, 3 Lebelebe natende na Mwiya Mayombo, nu natunda kwitendela ku Kalaga. 4 Tondo inyuwe muli beiza, muli basaki beteli na mutali. 5 Muneikede kibibi nunse, nunabede na menge. 6 Ungwililazi ku makengelo mane, nu nkumulolesia bitondo byane. 7 Ndi mukutenda buza ku bitondo bya Kalaga? Ndi mukukengela buza bweinyu bunakasia Kalaga? 8 Ndi mwatunganana kwemana ku lulenge lwa Kalaga? Nu kwenda myango mu kiziki kyage? 9 Ndi Kalaga alola ku bitondo byeinu, ndi anamona ku kimozi kisoga? Ndi munavwama kwengelela Kalaga anga bumukwengelela bantu? 10 Lebelebe Kalaga anamuzugila, ndi mukulolesia lutundo ku bantu mu lumbisombiso. 11 Ndi tamukukua lutanuno lwage boba, nu boba bwage ndi tabunamuzikya? 12 Menge meinyu meli anga lwito lukulenga, nu kwakula kweinyu kuli anga bisogo.
13 Ikalazi kibibi, nsigazi nitende, nu kinsania kimbasile. 14 Kubuni nabika mubili wane munkatini mwa meinyo mane? Nu kukasana kalamo kane mu maboko mane? 15 Aba ndi anite, kilemanizio kyane kili kweli, nitendele lwabusio lwage. 16 Kitondo kikino kyabe lonio lwane, kubuno utakatizia ntanemana lwabusio lwa Kalaga.
17 Ungwililazi bitondo byane, nisambale ku matuzi meinyu. 18 Ungwililazi kusambala kwane kunsania, nizi buno nili wisanana. 19 Nazi wanakanie? Ndi ta bubo nili kayikayika kutatenda nu kukua. 20 Kalaga, nkukubuzia bitondo bibili, ndi witabizia, nsinabinana lwabusio lwobe. 21 Ntunitie na boba, nu ntunsalimie na bya kunitia boba. 22 Ndi wambuzia nakwakule, aba nitende nu wanakule. 23 Bwagi bwane nu mibi zane zili inga? Ndolesie kusa nu mibi zane. 24 Kubuni ukumbisama? Kubuni ukunganza anga mwiti wobe? 25 Ndi ukusungia lusamba lukulenga na lumpumpu? Nu ndi unayanga mintula byakama?