Busosu bwa bantu
14
1 Nu atendile lingo bunee: “Wamulume wabutilwe na mukikulu, eli na bindi bikeke bizazibwa na tubebe. 2 Akukula nu kukua yiliyili anga iduba, eli anga kilimelime ga kisi; ntakulama nunse. 3 Nu Uwe, Kalaga wane, ndi ukulola bubuno na meiso mobe, nu kumbasia ku lusungio lwobe? 4 Nazi unavwama kutikya kisoga mu kibi? Ta wampa. 5 Waganzile bindi byage mu kubutwa kwage, nu ukumenya maganzo ma myezi zage. Wasombwede kuzinda kwa kalamo kage, nu ntanakutinga. 6 Siga kumulola buno omunwe, aaba nu akasililizia bindi byage anga mukiti wa mulimo. 7 Ndi muti wasindwa, nti guli na kilemanizio kya kwasa lingo ntabi, nu tazome lingo. 8 Ndi mizi zago zili, nu bilongo nu masina mago makuoma, 9 Nti zinasa na mazi, anga bukwasa mbuto.
10 Tondo muntu ndi alekana, nti ayikwa, nu kuni kweli? 11 Ndi mazi makama, nti kiziba kyakama; aba luuzi lwakama ndi mazi malo makama. 12 Ububo bakuzi tabakuyuka lingo, aaba ku milyalya. Beli ku tulo tuteli twa kuyuka.
13 Songo wambisa mu kisi kya bakuzi, aaba nu bongoa bwobe bwasila, nu kumbika nkungu za kunkengela lingo. 14 Ndi muntu akua, ndi analama lingo? Tondo nkulindila bindi bibyo bya tubebe bitinge, aaba nu kukandulwa kwane kwabasa. 15 Ukammana nu nkakwitabila, kubuno ukutunda kummonako lingo, nne kibumbwa kyobe. 16 Tondo ukuganza masomoneno mane, ndi ntukuganza mibi zane? 17 Wakandile mibi zane mu nsago zobe, nu kuzikukila.
18 Miduko zakalika ntita, nu nanda nti zabunguka. 19 Mazi makukokola makozi, mbula zikusimuna bisogo. Ububo nu uwe ukwita kilemanizio kya muntu. 20 Ukumwita ku milyalya nu kumuzikya; ukugalukya kilungi kyage nu kumupumbia. 21 Bana bage bakukaswa lutanuno, nu we ntakubumenya, nu ndi bakubengwa, tondo we ntakubumenya. 22 Akukengela tugu mbabazio za mubili wage, nu tubebe twa mutima wage.”