Elifasi akuzugila Yobu
15
1 Elifazi muTemani akwide bunee: 2 “Muntu wa menge ntanakula na bukongolo, aba kwibingia na moki ma buliabulia. 3 Ndi anatenda na moki mateli na mutali, nu mateli masoga? 4 Uwe witila kubigia meigisia ma Kalaga, nu uwe ukukanda nzila za kukumbamina Kalaga. 5 Bwagi u bukukutendia bubo, nu kutenda kwobe kuli na bwengelezi. 6 Bibyo bikutuka mu kanua kobe bikukusungia, ta nne, binsania byukutenda u bikukubigia. 7 Ndi uwe u muntu walingile kubutwa? Aba ndi wabezaga mu kisi lwabusio lwa miduko insania? 8 Ndi wungule ku lwango lwa kakungu ka Kalaga? Ndi uwenyene umpanga u wakatile menge? 9 Wizi kikizi kituteizi? Nu uli na bumenyinino bukizi bututeli nabo? 10 Twakatile menge meitu ku bakungu, babutilwe nti so ntebutwa.
11 Ukusomba kubobelezia kwa Kalaga, nu moki meitu ma bubobelelo. 12 Kubuni mutima wobe ukukwengelela? Nu kubuni meiso mobe meli makali? 13 Ukongelwa Kalaga, nu kumubenga. 14 Muntu eli kikizi buno abe wasililila? Wozo wabutilwe na mukikulu ndi anisanana? 15 Ndi Kalaga ntakulemanina banzelo bage, nu meigulu tamasililila lwabusio lwage. 16 Embe lino bantu beli na nsese za bwagi, nu bakunua mibi anga mazi.
17 Ungwilila bunkukubula, siga nikubule bibyo binizi. 18 Beiya menge banigisizie bingi bya bulili, u bibyo bibongule ku beisibo nu tababibisile. 19 Bakasilwe kisi kyabo na Kalaga, nu tabagomanizie na mugeni umozi.
20 Mwagi eli na tubebe bindi byage binsania, nu kalamo kage keiyala na lusungio. 21 Akungwaga ku moki makumwitia boba, nkungu zili na bubobelelo nti mwiti amubasila. 22 Nteli na kilemanizio kya kutuka mu nzila za kapilo, kubuno akulindilwa na muntu umozi kumwita. 23 Akuzangazanga kulonda idia, kuni kulili? Eizi buno eli bwigi na kukua. 24 Atimbwa na bitondo bibibu bikumwitia boba, bikumwita anga mukota uli kayikayika ku bita. 25 Kubuno abikile kuboko kwage ku Kalaga, nu kwitila na lwikotio lwage ku Mwiya Mayombo. 26 Eli n'itoe ibibu nu kabenga, anga mwiti ukukata ngabo zage nu kusakya Kalaga.
27 Akutukumizia malanga mage na mwambo, nu mubili wage walinda. 28 Nu we eikede mu makindu, mu numba ziteli mu bantu lingo, zabezaga bwigi na kwenduka. 29 Bugumi bwage tabwizizie, nu bikulo byage byabombe, nu biyikanwa byage tabyase.
30 Ntatuke mu kapilo, abe anga muti wagia ntabi na keiya, nu maluba mago malenge na lumpumpu. 31 Ndi alemanina bwengelezi nu kwiyengelela, nti atubule bwengelezi. 32 Bubo bwabe lwabusio lwa lukuo lwage, nu ntabi zago zome. 33 Anga muzabibu ukukolokya biguma bitela, nu anga mizeituni zikukolokya maluba. 34 Beiya bwagi babe bagumba, nu keiya kagisie numba za bakaswa bikulo bya bwengelezi. 35 Wozo ukukala lwango lwa kwitia ungo na kabebe ntamone mutali. Mitima zabo zikukala lwango lwa bwengelezi.”