Iyakulo lya Yobu ku Elifasi
16
1 Yobu akwide Elifasi bunee: 2 “Nungule ku bitondo bibino mambizi mansania, kubibya kweinyu kunsania takusoga. 3 Ndi moki mobe ma bulia tameli na kuzinda? Kikizi kikukusindika kwakula? 4 Songo uli mu kiziki kyane nu nne mu kiziki kyobe, songo ninatenda binsania bimukutenda, ninatengiatengia itoe lyane na kabebe, nu kumukutia na moki meingi. 5 Ninamulindizie na moki mane, nu kumubibya mu tubebe tweinyu. 6 Moki meingi tamanabibya tubebe twane, aba ndi nikala kibibi, tubebe twane tatunabibibwa. 7 Kalaga ankutia nunse, atikizye bansania babezaga bantimba. 8 Wankatile bubibu, buli bulongeki kundi; nu konda kuli kundi, ku kundongekela lwabusio lwane. 9 Kalaga ansomba nu kunita, eli anga wandimbanizia meinyo, nu kunsumita na meiso. 10 Bantimbikanina nu kunasulila kanua, bandibula ku itama nu kundinga. 11 Kalaga ankasana ku bantu babi, nu kumbika mu maboko ma babi.
12 Nabezaga mu bubobelelo, nu Kalaga ambungwide; nu ankatide g'ikosi, nu kunkalikya byindibyindi; ambikile kalolesio anga nsubi zage. 13 Kalaga akunisa misungu ku ntungo insania, nu zikunsumita kuteli kyombo. Aaba nu kusala nsangu gansi. 14 Mambizi mansania akumbelabela, akumvwila anga mukoloboyo mukali. 15 Navwede makunino ku mubili wane, nu nikede mu mukungu. 16 Meiso mane makisimana na bisozi, nu namonine ku kilimelime kya lukuo. 17 Nsyitile muntu, nu masego mane meli ma bulili.
18 Nsi, ntukukile mikila zane, nu idilo lyane talisile. 19 Mulongeki wane eli kwigulu. Emana anga mulongeki wane. 20 Bilemba byane bikumbenga, tondo bisozi byane bikugela lwabusio lwa Kalaga. 21 Songo kuli mulongeki wane ganisamba na Kalaga, anga bukusegela muntu kilemba kyage. 22 Kubuno nsili na bindi byingi lingo, nkwenda ku nsikasubya.”