Yobu etamina lukuo
17
1 Nu atendile lingo bunee: “Nsikwiza busoga lingo, nili bwigi na kulekana, nsinda zikundindila. 2 Bantu bakunsuna nu kunililika, mutima wane ukulila ku kabamba kabo. 3 Ee Kalaga, nnitabizie, bunatenda buligo, nsili na ungo kunkasia, umpanga Uwe. 4 Watikizye bumenyinino bwa mitima zabo, ntuzige beikaka kundi. 5 Beli anga muntu ukubuzia munyage kulia, tondo bana bage tabeli na kena.
6 Kalaga ankita nsumo za bantu, bakungwa nu kuvwa kunswila matazi. 7 Nili kyuku ku kabamba ka kulila kwane, nu mubili wane use wakua tugu. 8 Ku kabamba kako bantu beisanana bakuganagana, nu wozo wisanana akusungia bateisanana. 9 Muntu wa bulili akulama mu nzila zage, nu uli na maboko maswaga akumona magala.
10 Tondo vwazi inyuwe bansania, subyazi bansania, nsinamona mwiya menge umozi munkatini mwabo. 11 Bindi byane byasila, bulongeki bwane bwakua, kilemanizio kyane kyasila. 12 Bilemba byane bagalukya kindi kuba busi, bakutenda buno kyengi kiliko, tondo nne nili mu kapilo. 13 Ndi nkulindila nsinda kuba numba zane, nu kwanza mugu mu kapilo, 14 Ndi natenda buno nsinda zili tatane, nu mikuso zili mmane nu mibuto zane, 15 ndi nili na kilemanizio lingo? Nazi wizi kyo? 16 Nazi uli kayikayika kuyikwa gamozi na nne, nu kwenda gamozi na nne ku kiziki kya bakuzi?”