Bildadi akulolesia lukalilo lwa bantu babi
18
1 Bildadi muSuhi akwide bunee: 2 “Yobu, ndi ntunasiga kutenda? Songo ukungwilila, songo nu iswe tukutenda. 3 Ndi ukukengela tuli anga nyama? Ndi tatuli basoga lwabusio lwobe? 4 Ukwiyitia na bongoa bwobe, ndi kisi kyazikibwe ku kabamba kobe? Ndi kilimbi kigibwe ku kiziki kyakyo? 5 Kyengi kya mutima wa babi kyazime, nu takyabangibwe lingo. 6 Kyengi kide mu numba zage za hema, tusuku twage tatukusana. 7 Masomoneno mage mabezaga na magala, tondo meseli matamba, lwango lwage lwamugusie.
8 Kubuno magulu mage makukatwa mu bukila nu kugwa, nu akukoloka mu muzinga. 9 Isindi lyakatwa mu itega, nu muzigi wamukanda. 10 Bakubisa muzigi gansi, nu kutega matega mu nzila zage.
11 Atimbwa na boba, bukuyanga masomoneno mage. 12 Nzala zatikya magala mage, nu kubiga kwage kuse bwigi. 13 Kikoba kyage kili na lusambo, nu lusambo lutangi lukwita mubili wage. 14 Atukibwe mu numba zage zaakulemanina, nu kwekwa lwabusio lwa mukota wa kukwilwa masisi. 15 Bantu bageni beikale mu numba zage, nu buuza bwabe gantata ga numba zage. 16 Ububo abe anga muti woma mizi zago, nu ntabi zago zaseswa. 17 Lukumu lwage lwasila mu kisi, nu izina lyage libililwa nunse. 18 Ukutukibwa mu kyengi nu kwiswa mu kapilo, nu kutikibwa mu kisi kya balami. 19 Ntabe na mwana aba kibuti munkatini mwa bantu, nu takwabe wampa wa kwiyana kiziki kyage. 20 Bansania mu kisi bakaganagana ku bibyo bitondo, nu kukua boba bukali. 21 Bubo u bwabe kuzinda kwa beiya bwagi, babo bateizi Kalaga.”