Bukatizio bwa Yobu ku Kalaga
19
1 Nu Yobu akwide bunee: 2 “Ku nkungu nkizi mwitia mutima wane na kabebe? Nu kunsumita na bwingi bwa moki? 3 Mambizi ikumi mukundinga; tamukukua na nsoni na kuntendela bubi. 4 Ndi nusile, nti keli katati kane. 5 Mukwisakika buno muli bakindi bane, nu ku kabamba ka katati kane nkubabalwa. 6 Menyazi buno Kalaga u wansungia, nu kuntimba na bukila bwage. 7 Lola, nkulila na mbabazio, tondo nsikungubwa; nkulila buno nikasibwe, tondo takuli ukumbingia. 8 Azibile nzila zane buno nsitinge, nu kubika tugu kapilo muzo. 9 Abigizie lukumu lwane, nu antikizye nkumbu zane ku itoe. 10 Andibwide ku ntungo insania nu kunzikya, nu kwita kilemanizio kyane, nu kunsiga anga muti wayulwa nu kuoma. 11 Kalaga anongedwe bubibu, nu kunganza anga mwiti munene wage. 12 Asinga bantu anga bakoloboyo beingi kunita, bantimba nu kulonda bita.
13 Enzizie mibuto zane bulazi na nne, nu andekanukya na babo benizi. 14 Mibuto zane nu bilemba byane bansiga. Nili mugeni kubeli. 15 Babo bakwikala ku numba zane, nu tulemba twane banibilila, nili anga mugeni ku beli. 16 Kungwa namana mukiti wane, ntakunitabila, aba namusega na komanizia. 17 Mukazi wane ntakutananizibwa na lukita lwane, nu mibuto zane tabakuziga kunkunda. 18 Bana bakeke bakunyega, ndi nazanzuka bakunseka. 19 Bilemba byane byansomba, babo banatundaga bangalukila. 20 Kikoba kyane nu misuna zane zalandana na makwa, makwa mane mese gambuga anga meinyo.
21 Inyuwe mibuto zane, nkwilazi kyombo, kubuno kuboko kwa Kalaga u kukunita. 22 Kubuni mukunita anga bukunita Kalaga, aba tamukulekela kunsumita na moki meinyu?
23 Songo bitondo byane byasanzwe! Songo byasanzwe mu kigondi kya mukanda! 24 Aba kusanzwa mu lwanda na kyuma, buno masanzo mamo meizizie ku milyalya.
25 Nizi buno mukuluzi wane eli mulami, nu mu kuzinda akemana mu kisi; 26 kumbusa kwa kubola kwa kikoba kyane, nti mu mubili wane nkamona ku Kalaga. 27 Nnenyene namumoneko, ee namumone, aba ta ungo. Nu kilemanizio kya mutima wane kyasile.