Zofari alolesizie lukalilo lwa bagi
20
1 Zofari muNamati akwide bunee: 2 “Yobu, makengelo mane makunzangianzangia, ububo nkusasia kwakula. 3 Nungule meigisia mobe makunililika, nu mutima wane wizi bwa kwakula. 4 Ndi ntwizi kutukila wakalazi, gabikile Kalaga bantu ga kisi, 5 mbogimbogi za babo bagi tazikwizizia, nu mbogimbogi za babo batakukua Kalaga boba zili ku nkungu nkeke tugu. 6 Ndi lwikotio lwage lwika kwigulu, nu itoe lyage lika ku bimpa, 7 nti akazimina anga tubi twage ku milyalya, babo bamumonineko bakabuzia bunee: ‘Kuni kweli?’ 8 Akabomba anga ndozi, ntakamonekako lingo. Akapumbibwa anga ndozi za mu kindi. 9 Wozo wamumonineko ntakamumonako lingo, ntakamonekako lingo ga kiziki kyage. 10 Bana bage batunganana kusubya bibyo byanyagile bazambi, nu we wenyene akabasubizia lingo bikulo byabo. 11 Makwa mage mabezaga meiyala na magala, tondo meiyombeke nage mu mukungu.
12 Bwagi bwabezaga idia lya nse mu kanua kage, nu abubisile kunsi kwa lulami lwage. 13 Akubumuma mu kanua kage anga lwezia, nu ntakuziga kubumena. 14 Tondo munda mwage idia lyage lyagaluka lubaba, nu idia libe anga lulalo lwa nzoka munda mwage. 15 Amenine bikulo, nu abisale lingo; Kalaga abitikye munda zage. 16 Amumine lulalo lwa sanda, nu lulami lwa nzoka nkali lukamwita. 17 Ntakamona lingo ku nuuzi, nuuzi zizile na buuki nu mabele. 18 Akasubya binsania byakitide mulimo, ntakaba na bindi bya kubogaboga na bikulo byamonine. 19 Kubuno anyagile bazambi byabo, anyagile numba zobakile ungo muntu. 20 Nu nzala zage zabezaga nkali, ntavwamine kwikuta, nu ntakalekela ntundo zage. 21 Gaasilile kulia, takwasigede lubobu lwampa, tondo kano kaluma bugumi bwage bwasila.
22 Gesembuka, tubebe twamubasila, nu maboko ma basungibwa bansania makaba kweli. 23 Gaasile kwikuta binsania byakutunda, Kalaga akamusingila bongoa bwage bukali. Bongoa bwage bwabe anga mbula za mikenzi. 24 Ndi atina mwene wa nganda, nti musungu wa kyuma wamusumita. 25 Musungu ukumusumita nu kubasana mweli, nu ntonga zago zabasa ku nsangu zage, nu mbabazio nkali zamukata.
26 Kapilo kakali kakukila isuku lyage linsania, nu keiya katakugulumizibwa na muntu kakumugisia, nu binsania byage. 27 Bwagi bwa wozo muntu bwabisulwe kwigulu, nu kisi kyamuswilile. 28 Bongoa bwa Kalaga bukutikya binsania bya numba zage, anga munembwe ukugezia numba. 29 Ububo buli lukalilo lwalongekile Kalaga ku mwagi, u ntiko zabikile Kalaga kweli.”