Yobu akwakania Zofali
21
1 Ububo Yobu akwide Zofari bunee: 2 “Ungwilila iyuki lyane, nu moki mane makukukasa bubobelelo. 3 Sigazi nitende, nu kumbusa mwanililike ndi mwatunda. 4 Myango zane, ndi zili ku kabamba ka muntu? Kubuni mutima wane ta uneikilila? 5 Ndolazi nu mwangame, nu ikatililazi ku busundo. 6 Kungwa nakengela bibyo byambaside, nti nangama nunse nu kugilimina.
7 Kubuni bagi bakulama, nu kuba bakungu nu kwitila na magala? 8 Bana babo nu bayukulu babo, bakwitila lwabusio lwabo. 9 Bubobelelo buli mu numba zabo, tabakukua kampa boba, kasusula ka Kalaga takabe kubeli. 10 Balume ba ngombe bakwitila na magala, nu mabuti mazo tamakukolokya meimi. 11 Bakusiga bana babo kwenda anga byana bya mikoko, nu bana babo bakutumatuma anga byana bya mikoko. 12 Bakwimba na bapili nu nzenze, nu kubogaboga ku iyuki lya tupyelele. 13 Kalamo kabo kansania keli kasoga, kumbusa bakukua kuteli mbabazio. 14 Bantu babano bakwakula Kalaga bunee: ‘Tutukile bubo, kubuno tatukutunda kumenya nzila zobe. 15 Wozo Mwiya Mayombo eli na bwangato bukizi kutuli, buno twatunganana kumwanza, aba kuli mutali mukizi kusega kweli?’ 16 Ndi kalamo kako kasoga takeli mu maboko mabo? Nsikwitabizia lwango lwabo.
17 Busi bukizi kalamo ka bagi kakazimibwa, aba tubebe kubabasila, aba Kalaga kubabeganizia tubebe mu bongoa bwage? 18 Ndi wamona apumbibwa na Kalaga anga nsamba zoma, nu kulenga na lumpumpu, anga mpepa zikulenga na lumpumpu.
19 Mukutenda buno Kalaga akasungia mwana ku kabamba ka bwagi bw'isi, tondo Kalaga atunganana kusungia isi wenyene, buno amulolesie bwagi bwage. 20 Beiya bwagi beeke lusungio lwabo bobenyene, nu kumona bongoa bwa Mwiya Mayombo kubeli. 21 Kungwa kalamo kage kasila, mbogimbogi za bana bage zili buni kweli?
22 Ndi muntu aneigisia Kalaga? Ndi We nteli ngatu za kusungia babo ba kwigulu? 23 Bantu bamozi beli na magala aaba nu busi bwabo bwa lukuo, beli na mbogimbogi nu bubobelelo. 24 Mubili unsania wage walunda, nu makwa meli mabibu. 25 Nu ungo akukua na kabebe mu mutima, geteli kusonda ku mbogimbogi zampa. 26 Bakukua nu kuyikwa mu nsinda bumozi, nu mikuso zikubalia.
27 Nizi makengelo meinyu kundi, nu kulongeka moki makunsumita. 28 Mukubuzia bunee: ‘Kuni kuli numba za wozo mwangati kano kaluma, aba numba za hema za beiya bwagi?’ 29 Ndi tamukubuzia babo bakutinga mu nzila? Aba ndi tamwizi misagu zibakusambala? 30 Mwagi akusigwa ku busi bwa lusungio, mwiya bwagi ntabase ku lusungio mu busi bwa bongoa. 31 Nazi wavwame kusambala bitondo byage ku meiso mage? Nu nazi wamulige bibyo byakitile? 32 Bamweke ku nsinda, balangi balange nsinda zage. 33 Bamuyike mu bisogo bisoga bya mu mpinga, nu bantu beingi bayange nzila zage, nu babo bendile lwabusio lwage tabanaganzwa.
34 Kubobelezia kweinyu kuli buliabulia, binsania bimwatendile bili buza tugu.”