Elifasi akusongela Yobu ku bwagi bwage bunene.
22
1 Elifasi muTemani akwide Yobu bunee: 2 “Kalaga eli na mutali mukizi ku muntu? Embe mwiya menge eli na mutali kweli wenyene? 3 Ndi busoga bwobe bukukitila Mwiya Mayombo kena? Aba ndi misako zobe misoga zikumukasia? 4 Ukukengela buno akukusungia ku kabamba ka boba bwobe? Ndi akusungie ku kabamba kakano? 5 Ndi bwagi bwobe tabuli bunene? Nu mibi zobe tazili ningi? 6 Watikizye nsulu za mubuto wobe geteli kabamba, nu asigede mundulu. 7 Ntwakasile babo bakukua na mpusia mazi, nu wimine babo bakukua na nzala idia. 8 Uwe wakatile kisi kinsania na bupuka bwobe, nu muntu wa bukuti eikede munda mwakyo. 9 Wapumbizie misigala geteli kwenda na kena, nu wabelile maboko ma nkubi. 10 Kano kaluma ukumona ku matega makutimba kunsania, nu boba bwa kitangalabesi bwakuzangiazangia. 11 Ntukumona kena mu kapilo, nu wazimina anga muntu wakoka mu mwiyalo.
12 Ndi Kalaga ntakwikala kwigulu? Eli kwasakama nunse kutinga nkeninkeni. 13 Nu uwe ukutenda buno Kalaga nteizi kena, nu ntanavwama kumona mu kapilo kanene. 14 Bimpa byamuziba ku meiso nu ntakutumona, nu akutabanga mu mpelela.
15 Ndi ukwikokomezia mu nzila za wakalazi, zezo zayangaga bantu babi? 16 Bazikizibwe kitangalabesi, lwabusio lwa nkungu zabo bakule na mwiyalo munene. 17 Babano batendile ku Kalaga bunee: ‘Tutukile bubo! Buni bunatukitila Mwiya Mayombo?’ 18 Tondo Kalaga abakasile binsania bisoga ku numba zabo, tondo makengelo ma babi meli bulazi na nne.
19 Bantu basoga bakumona kukua kwabo nu kubogaboga, nu beisanana bakubaseka. 20 Bakutenda bunee: ‘Lebelebe babo babezaga batwangata tabeli kena lingo, nu byabo binsania byasigede byiswa mu keiya.’
21 Itabizia Kalaga, nu wabe na bubobelelo, nu wabe na busoga nage. 22 Katizia meigisia mage, nu langa moki mage mu mutima wobe. 23 Kungwa wibotya nu kusubya ku Kalaga, nu kutikya bwagi bunsania mu numba zobe. 24 Nu kubika olo mu mukungu, nu olo za Ofiri munkatini mwa makozi ma luuzi. 25 Nti Mwiya Mayombo abe olo zobe, nu feza za bukunza bukali zobe.
26 Nti walole ku Kalaga nu kwegamina kweli, nu wabogeboge mu Mwiya Mayombo. 27 Wamusege, nu We akungwilile, nu wazindilizie idagano lyobe kweli. 28 Kinsania kyukukita kyabe kisoga, wabe na menge anga kyengi kusania nzila zobe. 29 Kalaga akukegia wozo uli na lwikotio, nu akonia wozo wabota. 30 Akonia aba wozo uteisanana; ee, akonibwa na kwisanana kwa maboko mobe.”