ESTERI
Kisagulo kya Mukota Ahasuero
1
1 Mu bindi bya Ahasuero, wozo wangatile kutuka ku kisi kya baHindi aaba nu ku kisi kya Etiopia, u bibe lukama nu makumi mabili nu mutubakamo bya miino minene, 2 mu bindi byage wozo mukota Ahasuero geikede ga kisumbi kya bukota bwage kyabezaga mu Susani, u numba nnene zage, 3 mu mwaka w'isatu wa kwangata kwage, akitide bangati bage bansania nu mitonge zage kisagulo. Bangati ba mayombo ba Persia nu Media, nu bangati ba miino minene nu mitonge babasile lwabusio lwage. 4 Ku bindi lukama nu makumi kinana, alolesizie bikulo byage byingi bya bukota bwage nu busoga bwage nu lutanuno lwage. 5 Ku kuzinda kwa bindi bibyo, mukota akitile kisagulo kya bindi mutubakamo ga mulungu wa numba nnene za mukota, ku bantu bansania beikede mu mwino wa Susani, mwino munene, banene nu bakeke gamozi. 6 Ga mulungu gabezaga nsulu za kitani zenga nu z'idangi ly'igulu. Zaswikwa na mizigi za kitani kyenga nu na nsulu z'idangi lya misamba za mpene, ku mpo za feza zabikwa ku mango ma makozi ma bukunza bukali. Gabezaga migu za olo nu za feza ga makozi ma gansi ma nkita ningi ma bukunza bukali. 7 Banusizie bantu maku mu bibangala bya olo, na kyo na kyo na kyengukana na bingo, nu maku mabezaga mengi bulingilingi na lukaso lwa mukota. 8 Ku ikakizio lya mukota na muntu na muntu avwamine kunua maku maatundile.
9 Vashti mukikulu wa mukota nu we akitile kisagulo ku bakikulu mu numba nnene za bukota bwa Ahasuero.
Vashti mukazi wa mukota amwongia
10 Ku busi bwa mutubakamo, gabezaga Mukota Ahasuero akubogaboga nunse ku kabamba ka maku, akakizizie mintembele zage mutubakamo zikumukitilaga, u Mehumani nu Bizita nu Harbona nu Bigita nu Abagita nu Zetari nu Karkasi, 11 buno batole Vashti u mukazi wa mukota lwabusio lwage, avwala nkumbu zage za bukota. Akakizizie bubo buno alolesie bumbangilwa bwage, kubuno abezaga mbangilwa nunse. 12 Gabasile bakiti babo kuli mukikulu wa mukota Vashti n'ikakizio lya mukota, mukikulu Vashti ananine kwenda. Nu mukota ongilwe nunse, nu bongoa bwage bwabede bukali nunse.
Kwibibwa kwa Vashti mukazi wa mukota
13 Kubuno kwabezaga musako wa mukota kukala lwango na beiya menge nu bitondo bya mulembe nu bwisanana, akalile lwango na beiya menge basongolede bindi 14 nu babezaga bwigi na mukota, u Karsena, nu Setari, nu Admita, nu Tarsisi, nu Meresi, nu Marsena, nu Memukani, u bangati mutubakamo ba Persia nu Media, nu babezaga na bwangato kumonana na mukota. 15 Ababuzizie bunee: “Ku mulembe twakitile Vashti buni? Kubuno ntakitile anga bwakakizizibwe na mukota Ahasuero, nu bwatendilwe kweli na mintembele.”
16 Nu Memukani akwide lwabusio lwa mukota nu bangati bunee: “Mukikulu wa mukota Vashti akitile bubi, ta ku mukota tugu, tondo lingo ku bangati bansania nu ku bantu bansania ba bibe binsania bya bukota bwa Mukota Ahasuero. 17 Kubuno kitondo kya mukazi wa mukota kyamenywe na bakikulu bansania, aba bamulume babo babengwe lwabusio lwabo, ku nkungu zikyasambalwe buno Mukota Ahasuero akakizizie Vashti mukazi wage avwe lwabusio lwage, tondo ntavule. 18 Nu lelo bakikulu ba Persia nu ba Media bongule ku musagu wa kitondo kya mukazi wa mukota. Bubo kwabe kabenga kingi nu lunano. 19 Ndi bwatananizia mukota, mulembe wa mukota utuke kweli nu usanzwe mu milembe za baPersi nu baMedi, zitanavwama kugalukibwa, buno Vashti ntabase lingo lwabusio lwa Mukota Ahasuero. Nu mukota abike ungo uli musoga kumutinga mu kiziki kyage. 20 Nu nkungu mulembe wa mukota wasambalwe mu bukota bunsania bunene buno bakikulu bansania banze beiba babo, banene nu bakeke.”
21 Mukota nu bangati bage babogilebogile na lwango luluno, nu mukota akitile anga bwabezaga lwango lwa Memukani. 22 Asingile mikanda ku miino minene insania za bukota bwage, ku mwino na mwino mu masanzo mamo nu kusambala ku bantu na bantu mu mutendezi wabo buno wamulume na wamulume abe mwangati wa numba zage.