Esteri asombolwa kuba mukikulu wa mukota
2
1 Kumbusa kwa bitondo bibino, gasilile bongoa bwa Mukota Ahasuero, akengede Vashti nu buni bwakitile nu ikakizio lyakakizizibwe kweli. 2 Bakiti ba mukota bakalile lwango gamozi bunee: “Balondele mukota bikumi bili mbangilwa. 3 Mukota abike bemanizi mu miino minene insania za bukota bwage buno bakundamanie bikumi bili mbangilwa, bibino binsania mu numba za bakikulu ba mukota mu mwino wa Susani. Nu bibikwe ku maboko ma Hegai, muntembele wa mukota, buno abilange gamozi na bango bakikulu beli ku bulangi bwage, nu bakaswe binsania bya malebo. 4 Kumbusa kikumi kyatananizie mukota kibe mukikulu wage mu kiziki kya Vashti.” Mukota abogilebogile na lwango luluno, nu aluyangile.
5 Mu bindi bibyo, mwabezaga mu mwino wa Susani, muYuda umozi wa kikanga kya Benjamina, izina lyage Mordekayi; abezaga mwana wa Simei, mwana wa Kisi. 6 Ekilwe na Nebukadneza kutuka ku Yerusalema nu kwenda ku bukobe, munkatini mwa babo bekilwe ku bukobe gamozi na Yekonia, mukota wa Yuda. 7 Mordekayi abezaga na mwigoa wage winikilwe Hadasa, u waalangaga, kubuno ntabezaga n'isi aba nina; wono mukinga u wamanagwa Esteri, abezaga mbangilwa, nu Mordekayi amulangile anga mukinga wage gakule isi nu nina.
8 Gasambedwe ikakizio lya mukota, bakinga beingi bakundamanizibwe mu Susani, nu babikilwe ku bulangi bwa Hegai mulangi; nu Esteri abezaga gamozi na babo bekilwe ku numba za mukota, nu bakasilwe ku Hegai, mulangi wa bakikulu. 9 Wono mukinga Esteri amutananizizie nu kumona ku mponga zage. Hegai amukasile lubilo binsania bya malebo nu idia linsania lyatundile. Lingo amukasile bakiti mutubakamo baasombwede mu numba za mukota, nu amubikile gamozi na bakiti bage mu busio busoga bwa numba za bakikulu.
10 Esteri ntalolesizie kilongo kyage, kubuno Mordekayi amukakizizie buno ntasambale bubo. 11 Na busi na busi Mordekayi atingagatingaga lwabusio lwa mulungu wa numba za bakikulu, buno amenye musagu wa Esteri nu kikizi kyamubasile.
12 Lwabusio lwa nkungu za mukinga kwingila ku numba za mukota atunganana kwidebya myezi ikumi nu ibili anga bwakakizibwa, myezi mutuba za mwambo wa aliga, nu myezi mutuba za bulago nu mwambo wa kwengia mubili. 13 Ububo mukinga akwenda lwabusio lwa mukota: Kinsania kyatundile kweka kyakasilwe kweli kutuka ku numba za bakikulu kwenda nakyo ku numba nnene za mukota. 14 Mwigolo nti endako nu mu nindunindu nti asubya ku numba z'ibili za bakikulu mu bulangi bwa Sasagazi, u muntembele wa mukota walangaga bilemba byage. Mukinga ntanasubya ku mukota aba nti amutananizia nu amumanine ku izina lyage.
15 Esteri, mukinga watolwa na Mordekayi, kubuno Abihaili isi wa Esteri akule, gabede nkungu zage za kwingila kwa mukota zakuka, ntabuzizie kimozi kyakasilwe na Hegayi muntembele wa mukota mulangi wa numba za bakikulu. Esteri amonine mponga za bansania bamumonineko. 16 Esteri ekilwe kuli mukota Ahasuero mu numba zage za bukota mu mwezi w'ikumi u mwezi wa Tebeti mu mwaka wa mutubakamo wa kwangata kwage. 17 Nu mukota atananizizibwe na Esteri kutinga bango bakikulu bansania. Ububo Ahasuero abikile nkumbu za mukikulu wa mukota g'itoe lyage, nu amubikile kuba mukikulu wage mu kiziki kya Vashti.
18 Kusila kwa bubo mukota akitile kisagulo kinene ku mitonge zage nu ku bakiti bage bansania, u kisagulo kya Esteri. Asambede busi bwa kumunwa ku miino minene, nu akasenne nkaso bulingilingi na bugumi bwa mukota.
19 Nu nkungu za kukundamana kwa bikumi limbizi lya mabili, Mordekayi abezaga akwikala ga mwingilo wa numba za mukota. 20 Tondo Esteri ntalolesizie kikanga kyage aba kilongo kyage anga bwamukakizizie Mordekayi, kubuno Esteri abezaga akwanza makakizio ma Mordekayi, nu akitile anga bwakitaga gaabezaga mu numba zage.
Mordekayi onia mukota
21 Mu bindi bibyo bikede Mordekayi ga mwingilo wa mukota, Bigitani nu Teresi, bangati babili ba mukota balangaga mwingilo, bongilwe nu bakalile lwango lwa kwita mukota Ahasuero. 22 Tondo Mordekayi amenyine ku lwango lulo, nu alusambalide ku Esteri mukazi wa mukota, nu we Esteri alusambalide ku mukota mu izina lya Mordekayi. 23 Gabalondile kumenyinina musagu wozo nu bamonine buno wabezaga wa bulili, bangati babo babili bakaminwe ku muti, nu musagu wono unsania wasanzilwe mu mukanda wa misagu lwabusio lwa mukota.