NEHEMIA
Isego lya Nehemia
1
1 Bitondo bya Nehemia mwana wa Hakalia: Nabezaga mu Susani mwino munene, mu mwezi wa Kisileu ku mwaka wa makumi mabili wa mukota Artasasta. 2 Hanani, umozi wa mibuto zane, abasile na bamulume bamozi ba Yuda, nu bavule kundi. Nababuzizie misagu za baYuda basigede, u babo batukile ku bukobe, nu misagu za Yerusalema. 3 Banakwide bunee: “Babo batukile ku bukobe beli kuko mu kisi kikyo nu beli mu tubebe twingi nu nsoni. Kubuno mikolo za Yerusalema zasambulwa nu nibi za miingilo zazikibwa na keiya.” 4 Ganungule ku bitondo bibino, nikede gansi nu kubasa bisozi nu kulila bindi byingi. Nsyatundile kulia, nasegile tugu ku Kalaga wa kwigulu. 5 Nu natendile bunee: “Yehowa, Kalaga wa kwigulu, Kalaga Munene wa kukubwa boba, ukuzindilizia malagano mage nu kukwila babo bakumutunda nu kumwanza nu kwanza makakizio mage kyombo. 6 Ungwilila masego ma mukiti wobe, nu lola na meiso mobe ku masego makukukasa mukiti wobe musi nu kindi ku kabamba ka bana baIsraeli, bakiti bobe. Nkwigonga bwagi bwa bantu bubakwagide. Nne nu kikanga kya tatane twagile. 7 Twakwagide ku bitondo byingi, tatwanzile makakizio mobe aba milembe aba misako zobe anga buwakakizizie mukiti wobe Musa. 8 Nkukusega kukengela iyuki liwakakizizie Musa bunee: ‘Ndi mwaga, nti namubalangania mu bilongo binsania bya kisi. 9 Tondo ndi mwasubya kundi kwanza makakizio mane nu kumakita, nti nkakundamania lingo bana bobe kutukila kuko aaba nu ku ndenge za kuzinda kisi, nu kubasubya ku kiziki kinasombwede kubika izina lyane.’ 10 Babano beli bakiti bobe nu bantu bobe bawakulwide na magala mobe manene nu kuboko kwobe kwa magala. 11 Ee Yehowa, ungwa isego lyane, nu isego lya bakiti bobe bakubogaboga mu kukua izina lyobe boba nu kulyanza. Nkukusega buno mukiti wobe amone kyombo ku meiso ma wozo muntu.”
Mu bindi bibyo, nabezaga mweki wa lubiga lwa mukota.