EZRA
Kiro akasa bakandwa bwangato kusubya kwabo
1
1 Mu mwaka mutangi wa Kiro mukota wa Persia, abalanganizie makakizio mage ku bukota bwage bunsania, kubuno Yehowa asindikile mutima wage anga bwalenganizie Yehowa mu kanua ka Yeremia. 2 Kiro mukota wa Persia atendile bunee: “Yehowa, Kalaga wa meigulu, ankasile makota mansania ma kisi, nu ankakizizie kumobakila numba za kukumbamina Yehowa mu Yerusalema guli mu Yuda. 3 Nkutenda bunee: ‘Kalaga abe na muntu na muntu munkatini mwa bantu bage nu ende ku Yerusalema guli mu Yuda buno obake lingo numba za Yehowa, Kalaga wa baIsraeli, nyene Yerusalema. 4 Nu muYuda unsania ukusigala mu kiziki kyage anakasia banyage na feza, nu olo, nu bintu, nu ngombe, nu nkaso za lutundo za numba nnene za Kalaga zili mu Yerusalema.’” 5 Ububo matoe ma bikanga bya Yuda nu Benjamina, nu basankoga nu baLawi, basingilwe na Yehowa mu mitima zabo, bendile kobaka numba nnene za kukumbamina Yehowa mu Yerusalema. 6 Nu banyabo bansania babakasile feza, nu olo, nu bintu, nu ngombe, nu nkaso za lutundo ningi za bukunza bunene, nu mitebe za nkita insania. 7 Kiro mukota wa Persia atolile mpepe za numba nnene za kukumbamina Yehowa, zatolile Nebukadneza ku Yerusalema nu kuzibika mu numba za tulaga twage. 8 Kiro mukota wa Persia azilusizie ku Mitiredati u mulangi wa bikulo. Aziganzile nu kukasa Sesebasari mwangati wa Yuda. 9 Insania zabezaga maganzo mamano: mpepe nnene makumi mabili nu mubula. 10 Kwabezaga bingo bibungulu bya olo makumi masatu, nu bya feza bya lukita lw'ibili nkama inazi nu ikumi, nu ingo mpepe kanunu kamozi (1.000). 11 Binsania gamozi byabezaga tununu tutano nu nkama inazi (5.400) bya olo nu feza. Nu Sesebasari ekile bibyo binsania gamozi, gatukile bakandwa ku Babeli kusubya ku Yerusalema.