II NKIKO
Za Bakota ba baIsraeli
Kayulo ka Solomono ku Gibeoni
1
1 Solomono mwana wa Davidi agugumenne mu bukota bwage, nu Yehowa, Kalaga wage, abede gamozi nage, nu amutanwine nunse. 2 Solomono atendile ku baIsraeli bansania, ku basondelezia ba tununu nu ba nkama, ku ngatu nu ku bakota ba baIsraeli bansania, nu ku bakota ba bikanga bya beisibo. 3 Solomono nu musanganano unsania gamozi nage, bendile ku kiziki kyasakama kyabezaga ku Gibeoni, kubuno numba za Hema za Musanganano wa Kalaga zobakilwe na Musa, mukiti wa Yehowa, zabezaga kuko. 4 Tondo Davidi atikizye Sanduku za Kalaga kutukila Kiriati-Yearimu ku kiziki kyazilongekede, kubuno azikomide numba za hema mu Yerusalema. 5 Lingo, kasenga ka bisansa ka nsubi kakitilwe na Bezaleli, mwana wa Uri, mwana wa Huri, kabezaga ko lwabusio lwa numba za Hema za Musanganano za Mukota. Solomono nu musanganano wa bantu balondile Mukota. 6 Solomono abakamine ku kasenga ka bisansa ka nsubi kabezaga ku numba za musanganano, lwabusio lwa Yehowa. Gako, akasenne bisansa bya kugisibwa kanunu kamozi.
7 Mu kindi kikyo, Kalaga abaside Solomono, nu amubwide bunee: “Sega kyukutunda nakukase.” 8 Nu Solomono akwide Kalaga bunee: “Walolesizie tatane Davidi mponga nnene, nu wambikile mukota mu kiziki kyage. 9 Kano kaluma, ee, Kalaga Yehowa, idagano lyobe ku tatane Davidi lizindilizibwe, kubuno wambikile mukota ku bantu beli beingi anga mukungu wa kisi. 10 Mpe kano kaluma menge nu bumenyinino bwa kubasa nu kwingila lwabusio lwa bantu babano kubuno, nazi unavwama kwangata bantu babano bobe beli beingi?” 11 Kalaga akwide Solomono bunee: “Kubuno bubo bwabezaga mu mutima wobe, nu ntwasegile bikulo aba ntiko aba lwanzo aba lukuo ku babo bakusomba, nu ntwasegile kalamo kalazi, tondo wasegile menge nu bumenyinino bwa kwangata bantu bane banakubikile kuba mukota wabo, 12 Menge nu bumenyinino bwakaswa kuguli; nkukukasa lingo bikulo nu lwanzo lwa kutinga babo babezaga bakota lwabusio lwobe nu babo beli kumbusa kwobe.” 13 Ububo Solomono atukile ku kiziki kyasakama ku Gibeoni, kutukila ku numba za Hema za Musanganano, nu avule ku Yerusalema. Nu we angatile baIsraeli; 14 Solomono akundamanizie tuyanga nu babo bakwenda ga farasi; abezaga na tuyanga kanunu nu nkama inazi, (1.400) nu bakwenda ga farasi tununu ikumi nu tubili (12.000). Ababikile mu miino za tuyanga nu gamozi na mukota mu Yerusalema. 15 Mukota akitile feza nu olo zibe ningi, anga makozi mu Yerusalema, nu miti za mierezi zibe mingi anga miti za biguma zili mu Shefela. 16 Farasi za Solomono zatukile ku kisi kya Misri nu kya Kilikia. Babo bazikunzaga bazikatile ku bukunza bwakakizizie mukota. 17 Bukunza bwa kayanga kamozi katukile ku Misri bwabezaga byindi nkama mutuba bya feza, nu bukunza bwa farasi emozi bwabezaga byindi lukama nu makumi matano. Kumbusa bakunzia bazikunzizie ku bakota ba baHiti nu ba Aramu.