Idagano lya Solomono nu mukota Hiramu
2
1 Solomono akengede kobaka numba za kukumbamina izina lya Yehowa nu numba za bukota bwage. 2 Solomono akakizizie bamulume tununu makumi mutubakamo (70.000) buno beeke mizigo, nu tununu makumi kinana (80.000) buno bumbe makozi ku miduko nu tununu tusatu nu nkama mutuba (3.600) kuba basondelezia babo. 3 Solomono asingile mugenzi ku Hiramu mukota wa Tiro bunee: “Nkitile anga buwakitide tatane Davidi u wasingide mbavu za mierezi buno obake numba za kwikala muzo. 4 Kengela buno nili kayikayika kobaka numba ku izina lya Yehowa, Kalaga wane nu kuzikasa kweli buno tugisie bulago lwabusio lwage, nu kukasa kayulo ka tumpampa twa bindi binsania, nu bisansa bya kugisibwa bya nindunindu nu igolo, nu bya bindi bya Sabato nu bya mbalo za myezi nu bya bisagulo byasombwedwe, anga bwakakizizibwe baIsraeli ku milyalya. 5 Numba zinobake zabe nnene, kubuno Kalaga weitu eli munene kutinga tulaga tunsania. 6 Tondo nazi unavwama kumwobakila numba, ndi meigulu tamamukuka aba meigulu ma meigulu? Nu nne tondo, nili nazi buno nimwobakile numba, ndi ta ku kabamba ka buno zibe kiziki kya kugisia bulago lwabusio lwage? 7 Ububo kano kaluma nkukusega kunsingila muntu wa menge wa kukita bya olo nu bya feza, nu bya nsubi, nu bya kyuma, nu nsulu, nu wizi kubaza mbavu buno abe na bakiti, beiya menge beli na nne mu Yuda nu mu Yerusalema, bankasile tatane Davidi. 8 Lingo nsingile mbavu za mierezi nu miberoshi, kutukila Lebanoni, kubuno nizi bakiti bobe beizi nunse kwata mbavu ku Lebanoni. Nu bakiti bane babe gamozi na bakiti bobe, 9 bandongekele mbavu ningi kubuno, numba zinobake zabe nnene nunse. 10 Nu nakase ku bakiti bobe, bati ba mbavu, nzi tununu makumi mabili (20.000) za ngano zatutwa, nu nzi tununu makumi mabili (20.000) za shayiri, nu malega tununu makumi mabili (20.000) ma maku, nu malega tununu makumi mabili (20.000) ma makiti.” 11 Kumbusa Hiramu, mukota wa Tiro, akwide Solomono ku mukanda wamusingide bunee: “Kubuno Yehowa atunda bantu bage ukinsa akubikile mukota wabo.” 12 Lingo Hiramu asanzile bunee: “Yehowa, Kalaga wa baIsraeli, aganunwe, wakitile igulu nu kisi, nu wakasile mukota Davidi mwana, mwiya menge nu bumenyinino, nu we akobakila Yehowa numba za kukumbamina nu akobaka numba za bukota bwage. 13 Kano kaluma nasinga mutumbi, mwiya menge nu bumenyinino, izina lyage lili Huramu. 14 Eli mwana wa mukinga wa baDani, nu isi abezaga muntu wa Tiro. Akumenya kukita na olo nu feza, nu nsubi, nu kyuma, nu makozi, nu mbavu, nu na nsulu z'idangi lya misamba za mpene, nu n'idangi ly'igulu, nu zakisimana, nu zenga nunse. Eizi kukita nkita insania za kubaza nu kukita lukita lunsania lwatendwa, gamozi na bakiti bobe u bakiti ba so, mukota wane Davidi. 15 Ububo kano kaluma ku kitondo kya ngano nu shayiri nu makiti nu maku byatendile mukota wane, bisingwe ku bakiti bage. 16 Nu iswe twate mbavu insania ziukwiyanina ku Lebanoni, nu kuzisinga mu bitangi ku kitatenge ku Yopa, buno uzeke ku Yerusalema.”
17 Nu Solomono aganzile bageni bansania babezaga mu kisi kya baIsraeli anga maganzo makitile isi Davidi nu baganzile bageni tununu lukama nu makumi matano nu tusatu nu nkama mutuba (153.600). 18 Kubuno abikile tununu makumi mutubakamo (70.000) kweka mizigo, nu tununu makumi kinana (80.000) kumba makozi ku miduko, nu tununu tusatu nu nkama mutuba (3.600) kuba basondelezia kubika bantu ku milimo.