Kobakwa kwa numba za Kalaga
3
1 Nu Solomono alingile kobaka numba za Yehowa mu Yerusalema ga mwiduko wa Moria, geidolesizie Yehowa ku Davidi, isi, ku kiziki kyalongekilwe na Davidi ga mulungu wa kususula ngano wa Arauna muYebusi. 2 Alingile kobaka numba ku kindi ky'ibili kya mwezi w'ibili wa mwaka w'inazi wa kwangata kwage. 3 Kakano u kalingilo ka lwobako lwa numba za Kalaga kakitile Solomono ku malindiko ma wakalazi; bulazi bwabezaga mabusu makumi mutuba nu bungulu mabusu makumi mabili. 4 Lusu lwa lwabusio lwa numba lwabezaga na bulazi bwa lingimana na bungulu bwa numba, mabusu makumi mabili, nu bulazi bwa kusakama bwabezaga mabusu lukama nu makumi mabili. 5 Akukide munda mwa numba nnene na mbavu za miberoshi nu azikukide na olo nsoga, nu abikile kuzo bisusania bya miti za mbila nu miyololo. 6 Alebezie numba na makozi ma bukunza bukali buno zibe nsoga. Nu olo zabezaga olo za Parawaimu. 7 Ububo asingwide munda mwa numba na olo, nu mbavu zazo, nu mwingilo wazo, bitutu byazo nu nibi zazo. Ku bitutu abazile makerubi. 8 Akitile kiziki kyasililila nunse; bulazi bwakyo bwabezaga bumozi na bungulu bwa numba, mabusu makumi mabili nu bungulu bwakyo bwabezaga mabusu makumi mabili. Akikukide na olo nsoga za talanta nkama mutuba. 9 Buzitu bwa misumali za olo bwabezaga shekeli makumi matano ku shekeli za olo. Akukide masio ma gantata na olo. 10 Mu kiziki kyasililila nunse akitile makerubi mabili ma miti nu amakukide na olo. 11 Byupe bya makerubi byabezaga na bulazi bwa mabusu makumi mabili. Kyupe kimozi kya kerubi ntangi kyabezaga bulazi bwa mabusu matano, kitubagia ku kitutu kya numba, nu kikyo kingo kyupe kyabezaga kya bulazi bwa mabusu matano, kitubagia ku ntonga za kyupe kya kingo kerubi. 12 Kyupe kitangi kya kerubi z'ibili kyabezaga kya bulazi bwa mabusu matano, kitubagia ku kitutu kya numba nu kikyo kingo kyupe kyabezaga kya bulazi bwa mabusu matano, kyabezaga kyakulumana na kyupe kya kerubi ntangi. 13 Byupe bya mamo makerubi matakwa byabezaga mabusu makumi mabili; memenne na magulu mabo nu malolela ku kibuga kya numba. 14 Akitile nsulu z'idangi ly'igulu nu z'idangi lya misamba za mpene nu zakisimana nu za kitani kyenga, nu abikile kuzo bisusania bya makerubi. Mulimo wa Hiramu
15 Akitile lwabusio lwa numba mango mabili ma bulazi bwa mabusu makumi masatu nu matano gamozi na nkumbu za mabusu matano gantata gamo. 16 Akitile miyololo, anga bwakitile mu busio bwa numba, aziswikile gantata ga mango; akitile biguma lukama nu abibikile ku miyololo. 17 Eimikile mango lwabusio lwa numba za kukumbamina, limozi ku lulenge lwa kwidume nu lingo ku lulenge lwa kwikazi; amanine lilyo lya kwidume Yakini, nu lilyo lya kwikazi Boazi.