Bintu bya numba za Kalaga
4
1 Akitile kasenga ka kayulo ka shaba, bulazi bwako bwabezaga mabusu makumi mabili, nu bungulu bwako bwabezaga mabusu makumi mabili, nu kusakama kwako mabusu ikumi. 2 Akitile lupepe lunene lwa nsubi mu lukita lwa bilingana. Bungulu bwalo bwabezaga mabusu ikumi, nu kubilingana kwalo kwabezaga mabusu makumi masatu, nu buzindu bwalo mabusu masatu. 3 Kunsi kwalo kwabezaga bisusania bya ngombe, ikumi ku ibusu n'ibusu, byatimba lupepe lunsania mu milindi ibili, byanyengwidwe nalo ga muzonga. 4 Lupepe lwasakikilwe gantata ga bisusania bya ngombe ikumi nu ibili; kwabezaga isatu isatu zalolela ku ndenge inazi za kisi nu magulu mazo mabezaga munda mwalo. 5 Ititilimba lyalyo lyabezaga anga geigezye kuboko nu mubilingano wabezaga anga kisusania ky'iduba. Lyabezaga na buzindu bunakuka malega tununu tusatu (3.000). 6 Akitile zengo mpepe ikumi, itano ku lulenge lwa kwidume nu itano ku lwa kwikazi, ikumi nu isatu zabezaga na mulimo wa kusuga bintu bya kayulo nu lulo lunene u mwogelaga basankoga. 7 Akitile byanikilo ikumi bya olo mu lukita lwakakizizibwe nu abibikile mu numba za kukumbamina; bitano ku lulenge lwa kwidume nu bitano ku lwa kwikazi. 8 Nu lingo akitile meza ikumi nu amabikile mu numba za kukumbamina; matano ku lulenge lwa kwidume nu matano ku lwa kwikazi nu lingo akitile mpepe lukama za olo. 9 Nu lingo akitile mulungu wa basankoga nu mulungu munene wa bantu bansania gamozi na nibi zago nu azikukide na nsubi. 10 Nu abikile mpepe ku ntungo kwa lwibi lwa kukutukaga kisongo kya busi. 11 Nu Huramu akitile nyungu nu nkili nu mpepe, ububo Huramu azindilizizie mulimo wamukasile mukota Solomono kobaka numba za Kalaga. 12 Mango mabili nu gantata gamo anga nkumbu ibili, nu miyololo zabezaga gantata ga mango, 13 nu biguma nkama inazi ku miyololo ibili nu ku muyololo na muyololo milindi ibili zabyo, nkumbu zabezaga gantata ga mango. 14 Bikalilo ikumi nu mpepe nnene ikumi gantata gabyo, 15 lupepe lunene nu bisusania ikumi nu bibili bya ngombe kunsi kwalo; 16 nu nyungu, nkili, nu nkanya. Bibyo binsania byakitile Huramu, abikitile na nsubi ku ikakizio lya mukota Solomono buno abibike mu numba za kukumbamina Yehowa. 17 Mu kibitabita kya Yordani, mukota abinyengwide mu muzonga munene wa gasamba Sukoti nu Zaretani. 18 Solomono akitile bibino binsania byingi geteli kumenyinina buzitu bwa nsubi. 19 Ububo Solomono akitile bibino binsania ku numba za Kalaga. Kasenga ka bulago ka olo, meza ma kubika tumpampa twa kalolesio, 20 byanikilo bya olo nsoga nu tusuku twabyo twabangibwe anga bwakakizizibwe lwabusio lwa busio bwasililila, 21 nu maluba, tusuku nu bya kukalakasa tusuku bya olo, zezo olo nsoga nunse, 22 nu tulaso twa kukalakasa ntambi, bituma, byakuzimia tusuku, bya olo nsoga nu nibi za munda mwa numba ga mwingilo wa kiziki kyasililila nu nibi za kumbuga zabezaga za olo.