Sanduku z'Idagano
5
1 Bubo u bwasilile mulimo unsania wakitile Solomono ku numba za Yehowa. Alusizie binsania byakasile isi Davidi ku numba za Kalaga, u feza, nu olo, nu kasenga kansania, nu Solomono abibikile mu masuku ma mu numba za Kalaga. 2 Kumbusa Solomono akundamanizie bakulu ba Israeli nu mitonge insania za bikanga, nu basondelezia ba bikanga bya baIsraeli kuko ku Yerusalema, buno beeke Sanduku z'Idagano lya Yehowa ku mwino wa Davidi, wamanagwa Sayuni. 3 Bantu bansania ba Israeli bakundamenne lwabusio lwa mukota mu nkungu za kisagulo kinene, kya mwezi wa mutubakamo. 4 Ububo bakulu bansania ba Israeli bavule, nu baLawi bakatile Sanduku. 5 Nu bazekile gamozi na Hema za Kukulumana muzo nu binsania byasililila byazo. Basankoga baLawi bazekile. 6 Mukota Solomono nu musanganano unsania wakundamenne lwabusio lwa Sanduku z'Idagano, bakasile tuyulo twa mikoko nu ngombe zitanavwama kuganzwa ku bwingi bwazo. 7 Basankoga babikile Sanduku z'Idagano lya Kalaga ku kiziki kyazo, mu busio bwa munda mwa numba, u Kiziki Kyasililila Nunse, kunsi kwa byupi bya makerubi. 8 Makerubi malambizie byupi gantata ga Sanduku z'Idagano nu byupi byakukide Sanduku nu mingolo zazo. 9 Bulazi bwa mingolo bwatingile Sanduku buno ntonga zazo zimoneke kuzo ku busio bwasililila. Tazamonekile kuzo kumbuga. Sanduku zabezaga gago aaba nu lelo.
+ \fr 5:9 \ft Ukutenda buno aaba nu bubo busi bwa kusanza wono mukanda. 10 Mu Sanduku tamwabezaga kena umpanga zezo mbavu ibili za makozi zabikile Musa gago ku mwiduko wa Horebu, u mbavu z'idagano lyakitile Yehowa na baIsraeli gabatukile ku Misri. 11 Basankoga batukile mu Busio Bwasililila Nunse, nu bansania babezaga mo beikasenne ku mulimo wozo buno beingile mu Busio Bwasililila geteli kulola ku bibombo byabo. 12 BaLawi bansania beimbaga, Asafu, Hemani, Yedutuni nu bana babo nu mibuto zabo bavwalile nsulu nsoga zenga, bekile bindanda, nzenze nu mankimbi nu bemenne gasamba mwingilo nu kasenga ka kayulo gamozi na basankoga lukama nu makumi mabili bakwida myonze. 13 Nu babo bidaga myonze nu babo beimbaga baganwine nu kusima Yehowa. Batutile myonze nu mankimbi nu bindanda nu baganwine Yehowa bunee:
“Kubuno eli musoga,
Kubuno mponga zage zili za milyalya.”