Masego ma Solomono
6
1 Kumbusa Solomono atendile bunee: “Kalaga atundile kwikala mu kimpa kya kapilo kakali. 2 Nu nne nobakile numba za kwikala muzo nu kiziki kyobe kya kwikala milyalya.” 3 Nu mukota akebetukile nu akasile mponga ku baIsraeli bansania babezaga bemana. 4 Nu atendile bunee: “Aganunwe Yehowa, Kalaga wa baIsraeli, wazindilizizie bwabwide tatane Davidi bunee: 5 ‘Kutukila busi bunatikizye bantu bane ku kisi kya Misri, nsyasombwede mwino umozi munkatini mwa bikanga binsania bya Israeli buno banobakile numba zane buno izina lyane libe muzo, nu nsyasombwede wampa buno abe mukota ku bantu bane baIsraeli. 6 Tondo nasombwede Yerusalema buno izina lyane libe mugo nu nasombwede Davidi buno angate bantu bane baIsraeli.’ 7 Tatane Davidi akengede mu mutima wage kobaka numba ku izina lya Yehowa, Kalaga wa baIsraeli. 8 Tondo Yehowa abwide tatane Davidi bunee: ‘Wakitile busoga buwakengede kobaka numba ku izina lyane. 9 Tondo uwe ntwobake numba zezo; tondo mwana u ukabuta, akazobaka ku izina lyane.’ 10 Yehowa azindilizizie bubo bwatendile, kubuno niyana kiziki kya tatane Davidi nu kwikala ga kisumbi kya bukota bwa baIsraeli anga bwalagile Yehowa. Nu nne nobakile numba ku izina lya Yehowa, Kalaga wa baIsraeli. 11 Nu muzo nabikile Sanduku, muli Idagano lya Yehowa, lyakitile na bantu baIsraeli.” 12 Nu Solomono emanine lwabusio lwa kasenga ka Yehowa lwabusio lwa musanganano wa baIsraeli nu alambizie maboko mage. 13 Ububo Solomono akitile kyindo kya nsubi kya mabusu matano ku bulazi nu mabusu matano ku bungulu bwakyo nu kusakama kwakyo mabusu masatu nu akibikile munkatini mwa mulungu nu emanine gakyo, nu akomine mazu lwabusio lwa musanganano unsania nu alambizie maboko mu mpena. 14 Nu atendile bunee: “Ee, Yehowa, Kalaga wa baIsraeli, takuli kango Kalaga anga uwe, mwigulu aba mu kisi nu ukulanga idagano lyobe na kyombo ku bakiti bobe bakutabanga nobe na mutima wabo unsania. 15 Wakitide mukiti wobe Davidi, tatane, kikyo kiwamulagile. Ee watendile nage na kanua kobe nu wabuzindilizia lelo. 16 Nu kano kaluma, Yehowa, Kalaga wa baIsraeli, langa idagano liwalagile ku mukiti wobe Davidi bunee: ‘Ntukeida kundi muntu wakwiyana kwikala ga kisumbi kya bukota bwa Israeli, ndi bana bobe beidanga ku misako zabo nu kwenda mu milembe zane anga buwendile lwabusio lwane.’ 17 Nu kano kaluma, ee Yehowa, Kalaga wa baIsraeli, idagano liwalagile mukiti wobe Davidi likokomene.
18 Tondo lebelebe ndi Kalaga anikala na bantu mu kisi? Lola, igulu nu meigulu tamakuka kuguli, embe numba zeno zinobakile? 19 Yehowa, Kalaga wane, ungwilila masego nu kusima kwa mukiti wobe; lingo ungwilila idilo nu masego ma mukiti wobe maakusega lwabusio lwobe. 20 Meiso mobe malole ku numba zeno musi nu kindi, ga kiziki kikyo kiwakasile kuba ku izina lyobe. Ungwilila masego mekusega mukiti wobe gakyo. 21 Ungwilila kusima kwa mukiti wobe nu bantu bobe baIsraeli nkungu zibakusega ga kiziki kikino. Gawungwe ku bitondo bibino bikutuka ku biziki byobe, aaba nu kwigulu, sigilila bwagi bwabo. 22 Ndi muntu agila munyage nu kulumbila buno ntakitile bubo, avwe kulumbila lwabusio lwa kasenga ka numba zeno. 23 Ungwilila kuko kwigulu, nu atula, gasamba bakiti bobe, kusungia mubi, nu siga bwagi bwage kweli, nu engia wisanana kumukasa buli bwisanana bwage. 24 Nu ndi bantu bobe baIsraeli bakindwa lwabusio lwa beiti babo, kubuno bakwagide nu ndi bakugalukila nu kwigonga ku izina lyobe nu kukusega ku izina lyobe, nu kukusega nu kukusima mu numba zeno, 25 nti wabongwilila kuko kwigulu nu sigilila bwagi bwa bantu bobe baIsraeli, nu basubye ku kisi kiwabakasile nu beisibo. 26 Ndi igulu lyakandwa, takukuloka mbula, kubuno bakwagide, ndi basega ku kiziki kikino nu kwitabizia izina lyobe nu kugaluka ku bwagi bwabo kubuno ukubasungia, 27 ungwilila kuko kwigulu nu sigilila bwagi bwa bakiti bobe nu bantu bobe baIsraeli, kubuno ukubeigisia nzila zobe nsoga, nu lokya mbula mu kisi kyobe kiwakasile bantu bobe bakiyane. 28 Nu ndi nzala aba nsambo, kibozia nu mbubu, nzige nu mande byabasa mu kisi, nu ndi beiti babatimba mu miino zabo, nu nsambo nkali za lukita lunsania, 29 nu ndi muntu umozi, aba baIsraeli bansania basega nu kukusima nu bamenya na muntu na muntu lusambo lwage nu lukuo lwage nu alambya maboko mage ku numba zeno, 30 nti wabongwilila kuko kwigulu ku kiziki kyobe nu basigilile bwagi nu kukasa ku muntu na muntu anga bwabezaga misako zage, kubuno wizi mutima muntu na muntu, kubuno uwenyene u wizi mutima wa muntu na muntu, 31 buno bakukue boba nu kutabanga mu nzila zobe bindi binsania bibakulama mu kisi kiwakasile batateiswe. 32 Nu ndi mugeni, uteli wa bantu bobe baIsraeli, atuka ku kisi kili bulazi ku kabamba k'izina lyobe inene nu ka kuboko kwobe kwa magala kwalambibwa, ndi akuvwa kusega ku numba zeno, 33 nti wamungwilila kuko kwigulu ku kiziki kyobe nu kita binsania bikukusega wozo mugeni buno bantu bansania ba kisi bamenye izina lyobe, kukukua boba anga bukukita bantu bobe baIsraeli; bamenye buno numba zinobakile zikumanwa ku izina lyobe. 34 Ndi bantu bobe bakwitana na beiti babo kunsania kuwabasinga, ndi basega kuguli kugalukila ku mwino wono u wasombwede nu ku numba zeno zinobakile ku izina lyobe, 35 nti wabongwilila kuko kwigulu, kungwa masego mabo nu kusima kwabo nu bakitile binsania. 36 Ndi bakwagila, kubuno takuli wampa utakwagaga, nu ukubongelwa nu kubagabula ku beiti babo buno babigie kuba bakobe ku kisi kya bwigi nu bulazi; 37 tondo ndi bakengela mu kisi kibeigibwa kukyo nu beiyania nu kukusega mu kisi kya bukobe bwabo nu batenda bunee: Twakwagide, twakubengile, nu twakitile bubi nunse, 38 nu bagaluka kuguli na mutima wabo unsania nu na makengelo mabo mansania mu kisi kya bukobe bwabo kibeigizibwe mukyo, nu kusega ku kisi kyabo kiwakasile ku beisibo nu ku mwino wono u wasombwede nu ku numba zeno zinobakile ku izina lyobe, 39 nti wabongwilila kuko kwigulu mu kiziki kyobe kungwilila masego mabo nu kusima kwabo nu kubakitila bwisanana, nu kusigilila bwagi bwa bantu bobe bakwagide. 40 Kalaga wane, kano kaluma nkukusega, meiso mobe malole nu matuzi mobe mongwilile masego mu kiziki kikino. 41 Ee Kalaga Yehowa, zanzuka wingile mu kiziki kyobe kya kumunwa, uwe nu Sanduku za magala mobe. Ee Kalaga Yehowa, basankoga bobe bonibwe nu baswagibwa bobe babogeboge mu busoga. 42 Ee Kalaga Yehowa, ntwide mubongibwa wobe mugongo. Kengela kyombo kyobe ku mukiti wobe Davidi.”