Lutanuno lwa Kalaga lwamonekile mu numba zage
7
1 Nu gasilile kusega Solomono, keiya kagelile kutuka kwigulu nu kagisizie bisansa bya kugisibwa nu tuyulo; nu lutanuno lwa Yehowa lwizazizie numba. 2 Aba basankoga tabavwamine kwingila mu numba za Yehowa kubuno lutanuno lwa Yehowa lwabezaga lwazizazia. 3 Mu nkungu zamonine baIsraeli bansania buni bwagela keiya nu lutanuno lwa Yehowa gantata ga numba, bagwede gansi bukukama nu baganwine Yehowa bunee: “Kubuno eli musoga, kubuno mponga zage zili za milyalya.” 4 Kumbusa mukota nu baIsraeli bansania bakasenne tuyulo lwabusio lwa Yehowa. 5 Nu mukota Solomono akasenne tuyulo twa ngombe tununu makumi mabili nu tubili (22.000), nu mikoko tununu lukama nu makumi mabili (120.000). Ububo mukota nu bantu bansania bakasile mponga ku numba za Kalaga. 6 Basankoga bemenne mu biziki byabo bya busankoga nu baLawi na binsania bya kwimbila Yehowa byakitile mukota Davidi kuganuna Yehowa nabyo, gababikile Davidi ku mulimo wa kuganuna Yehowa bunee: “Kubuno mponga zage zili ku milyalya.” Nu basankoga bidile myonze lwabusio lwabo nu baIsraeli bansania babezaga gago. 7 Lingo Solomono akasenne kiziki kya mulungu kyabezaga lwabusio lwa numba za Yehowa, nu akasenne gago tuyulo nu manona ma tuyulo twa bubobelelo, kubuno kasenga ka kayulo ka nsubi kakitile Solomono takakukile ku tuyulo twa kugisibwa nu twa bubobelelo nu twa manona. 8 Ububo mu nkungu zezo Solomono abezaga na kisagulo bindi mutubakamo nu baIsraeli bansania gamozi nage mu musanganano munene, kutukila ku Hamati aaba nu ku luuzi lwa Misri. 9 Nu ku busi bwa kinana, amanine musanganano munene kubuno bakasile mponga ku kasenga ka kayulo bindi mutubakamo, nu babezaga na kisagulo bindi mutubakamo. 10 Ku busi bwa makumi mabili nu isatu bwa mwezi wa mutubakamo, asingile bantu ku numba zabo na mbogimbogi nu kyelele mu mitima zabo ku mponga zakitile Yehowa ku Davidi, nu ku Solomono, nu ku baIsraeli, bantu bage.
Mukota abasila Solomono limbizi lya mabili
11 Ububo Solomono atozizie numba za Yehowa, nu binsania byakengede Solomono ku mutima wage buno akite mu numba za Yehowa nu numba zage. 12 Nu Yehowa abaside Solomono mu kindi nu amubwide bunee: “Nungule ku isego lyobe nu nisombolede kiziki kikino kibe numba zasililila. 13 Ndi nakanda meigulu buno mbula taziloke aba ndi nakakizia nzige kubigia kisi, aba ndi nasinga nsambo munkatini mwa bantu bane, 14 ndi bantu bane, bamanwa mu izina lyane, beibotya, nu kusega, nu kundonda, nu kugaluka ku misako zabo mibi, nti nabongwilile kwigulu nu kusigilila bwagi bwabo nu konia kisi kyabo. 15 Kano kaluma nkulola nu nkungwilila masego ku kiziki kikino. 16 Kubuno nasombwede kubika izina lyane ku numba zeno ku milyalya. Nalole kuzo nu mutima wane wabe kuzo bindi binsania. 17 Nu ndi watabanga lwabusio lwane anga so Davidi nu kukita binsania binakukakizizie nu kulanga milembe nu makakizio mane, 18 nti nakokomezie kisumbi kyobe kya bukota, anga bunalagile ku so Davidi ganamulagide bunee: Ntukeida muntu wa kwangata mu baIsraeli.
19 Tondo ndi mwagaluka nu kusiga milembe nu makakizio mane manabikile lwabusio lweinyu nu mwenda kukitila tungo tulaga nu kutukumbamina, 20 nti namutikya mu kisi kinamukasile nu numba zeno zinabikile ku izina lyane; nti nazitikye lwabusio lwane nu kuzikita buno zibe nsumo nu kilingano lwabusio lwa bantu bansania. 21 Nu ku numba zeno zili nnene, bansania banatinga banaganagana nu batende bunee: ‘Kubuni Yehowa abukitile ku numba zeno nu ku kiziki kikino?’ 22 Nu bango bakule bunee: ‘Kubuno basigile Yehowa, Kalaga wa beisibo, wabatikizye ku kisi kya Misri nu bakatizizie tungo tulaga, kutukitila nu kutukumbamina. Ububo abakitide bubi bubuno bunsania.’”