Mango makitilo ma Solomono
8
1 Mu myaka makumi mabili, Solomono obakile numba za Yehowa nu numba zage. 2 Kumbusa Solomono obakile miino zamukasile Hiramu nu abikile baIsraeli muzo. 3 Nu Solomono endile kwitana ku Hamati-Soba nu agukindile. 4 Nu obakile Tadimori mu kalula nu miino insania za bigenge ku Hamati. 5 Nu obakile Beti-Horoni wa gantata, nu Beti-Horoni wa kunsi, miino za mikolo nu bitutu nu nibi nu bilimba, 6 nu Balati nu miino insania za bigenge zaabezaga nazo nu miino insania za tuyanga nu miino za babo bendaga ga farasi nu binsania byatundaga kobaka ku Yerusalema, ku Lebanoni nu kisi kyage kinsania. 7 Nu bantu bansania basigede ku baHiti, ku baAmori, ku baPerizi, ku baHivi nu ku baYebusi batabezaga baIsraeli, 8 kikyo kibuti kyabo kyasigede kumbusa kwabo mu kisi bateitilwe na baIsraeli, Solomono ababikile ku bukobe, u bubeli aaba nu lelo. 9 Tondo Solomono ntabikile baIsraeli kuba bakobe kubuno babezaga bantu ba bita, mitonge zage, basondelezia ba bakoloboyo bage nu ba tuyanga twage nu bendaga ga farasi zage. 10 Nu babano babezaga mitonge za mukota Solomono; nkama ibili nu makumi matano zangatile bantu.
11 Solomono atolile mukinga wa Farao kutuka mu mwino wa Davidi nu amubikile mu numba zamwobakide, kubuno atendile bunee: “Mukikulu wane nteikale mu numba za Davidi mukota wa baIsraeli kubuno biziki bya Sanduku z'Idagano lya Yehowa bili byasililila.” 12 Nu Solomono akasenne bisansa bya kugisibwa ku Yehowa ga kasenga ka bisansa bya Yehowa, kobakile lwabusio lwa numba, 13 anga bwabezaga mulembe wa busi na busi. Akasenne bulingilingi na makakizio ma Musa ku bindi bya kumunwa, nu mwezi muto nu ku bisagulo bisatu bya mwaka na mwaka; Kisagulo kya Kampampa Katagaga, Kisagulo kya Mazinga nu Kisagulo kya Nusu. 14 Anga bwabezaga makakizio m'isi Davidi, abikile bibombo bya basankoga ku mulimo wabo nu baLawi ku mulimo wabo wa kuganuna Yehowa, nu kukitila lwabusio lwa basankoga, anga bwabezaga mulimo wa busi na busi, nu balangi ba nibi mu bibombo byabo ku lwibi na lwibi; bubo u bwakakizizie Davidi muntu wa Kalaga. 15 Nu tabagalukile ku binsania byakakizizie mukota ku basankoga nu baLawi ku mulimo unsania nu masuku mabo. 16 Bubo u bwakitilwe mulimo unsania wa Solomono, kutukila busi bwa kubika kibanza kya numba za Yehowa aaba nu gazatozile. Ububo numba za Yehowa zatozile.
17 Kumbusa, Solomono endile ku Ezioni-Geberi nu Eloti ga mutili wa kitatenge mu kisi kya Edomu. 18 Nu Hiramu asingile maato na bakiti bage bamenyine Kitatenge,
+ \fr 8:18 \ft La Mer Mediterranee. nu bendile ku Ofiri gamozi na bakiti ba Solomono, nu batolile talanta nkama inazi nu makumi matano za olo nu bazekile ku Solomono.