Solomono nu mukikulu mukota wa Seba
9
1 Mukikulu mukota wa kisi kya Seba ungule ku lukumu lwa Solomono nu avule kweli na mbuzio mbibu. Avule na bantu beingi nu ngamia zekile bulago, nu bibyo byakuswgia idia, nu olo ningi nu makozi ma bukunza bukali. Gaabasile ku Solomono, amutendile bitondo byingi byabezaga mu mutima wage. 2 Solomono akwide mbuzio zage insania. Takwabezaga kimozi kyatavwamine kwakula kweli. 3 Nu gamonine mukikulu mukota wa Seba ku menge ma Solomono nu numba zoobakile, 4 nu idia lya meza mage nu kwikala kwa bakiti bage, nu mulimo wabo, nu nsulu zabo nu ku babo bekaga bya kunua, nu kyindo kyage kya kwenda ku numba za Yehowa, aganineganine bubibu. 5 Nu atendile ku mukota bunee: “Lukumu lwobe nu lwa menge mobe lunungule mu kisi kyane luli lwa bulili, 6 tondo nsyakatizizie bubansambalide aaba nu ganavwa kwimonena nnenyene. Lebelebe bunene bwa menge mobe bubansambalide buli kyindi tugu. Watinga lukumu lununguleko. 7 Mbogimbogi ku bantu bobe nu bakiti bobe bakwemana lwabusio lwobe, kungwa ku menge mobe. 8 Aganunwe, Yehowa, Kalaga wobe, wakubogelabogela nu wakubikile ga kisumbi kya bukota bwage ku kabamba ka Yehowa, Kalaga wobe. Kubuno Kalaga wobe atundile baIsraeli nu akutunda kubalindia ku milyalya, ukinsa akubikile mukota gantata gabo buno ukite bwisanana nu bulili.” 9 Kumbusa, akasile mukota talanta lukama nu makumi mabili za olo, nu makozi ma bukunza bukali nu bulago, nu bibyo byakuswagia idia bya nkita ningi. Takwabezaga bintu anga bibyo byakasile mukikulu mukota wa Seba ku mukota Solomono.
10 Lingo bakiti ba Hiramu nu bakiti ba Solomono bavule na olo kutuka ku Ofiri, bavule na mbavu za miti za misandali nu makozi ma bukunza bukali. 11 Nu na mbavu zezo, akitile kyindo kya numba za Yehowa nu numba zage nu bindanda ku babo batutaga bindanda. Lukita lwabyo talwamonekile kulo lwabusio mu kisi kya Yuda. 12 Mukota Solomono akasile ku mukikulu mukota wa Seba binsania byasegile kutinga bibyo byavule nabyo ku mukota. Kumbusa asubizie nu endile gamozi na bakiti bage ku kisi kyage.
Bikulo bya Solomono
13 Buzitu bwa olo bwavule ku Solomono bwabezaga talanta nkama mutuba nu makumi mutuba nu mutuba, 14 kutinga zezo zavule na bakunzia. Nu bakota ba Arabia nu bangati bavule na olo nu feza ku Solomono. 15 Mukota Solomono atulile ngabo nkama ibili za olo. Ku ngabo na ngabo kwabezaga shekeli nkama mutuba za olo zatulwa. 16 Nu atulile ngabo nkama isatu za olo, nu mukota azibikile mu numba za lubanda lwa Lebanoni. 17 Nu mukota akitile kisumbi kinene kya milamba, akikukide na olo nsoga. 18 Kisumbi kya bukota kyabezaga na byindo mutuba nu kiziki kya kulambizia magulu kya olo, nu ku lulenge na lulenge lwa kubika maboko kwabezaga kisusania kya kimbwe, 19 nu bisusania bya bimbwe ikumi nu bibili byemana gantata ga byindo, ku lulenge na lulenge lwa kyindo na kyindo kisusania kimozi. Lukita lwabyo talwamonekile ko mu makota mansania. 20 Bituma binsania nu bibangala binsania bya mukota Solomono byabezaga bya olo nu mpepe insania za lubanda lwa Lebanoni zabezaga za olo nsoga nunse. Mu bindi bya Solomono, bantu bakengede buno feza zabezaga bulia, 21 kubuno maato ma mukota mendile ku Tarsisi gamozi na bakiti ba Hiramu. Na myaka isatu na myaka isatu maato ma Tarsisi mavwaga na olo nu feza nu milamba nu bikosu nu nsoko. 22 Mukota Solomono atingile bakota bansania ba kisi ku bikulo nu ku menge. 23 Nu bakota bansania ba kisi balondile kumona ku Solomono kungwilila ku menge mage mamukasile Kalaga. 24 Na mukota na wavule na nkaso zage, bintu bya feza nu bya olo nu nsulu nu miti zikususania bulago nu byakuswagia idia nu farasi nu mpunda nu bavule nazo mwaka na mwaka. 25 Solomono abezaga na mikumba tununu tunazi (4.000) za farasi nu tuyanga nu abezaga na bantu bendaga ga farasi tununu ikumi nu tubili (12.000) baabikile mu miino za tuyanga twage nu ku Yerusalema bwigi na mukota. 26 Angatile bakota bansania kutukila luuzi lwa Furati, nu kisi kya baFilistini aaba nu ku mwaga wa kisi kya baMisri. 27 Nu mukota akitile feza kuba ningi ku Yerusalema anga bwingi bwa makozi. nu miti za mierezi kuba mingi anga miti za mikuyu za Sefela. 28 Nu bavule lingo ku Solomono na farasi kutukila Misri aaba nu bisi binsania.
29 Nu bitondo binsania bya Solomono, kutukila bitangi aaba nu bizinda, ndi tabyasanzilwe mu mukanda wa mulengania Natana, nu bulengania bwa Ahiya wa Siloni nu kulagula kwa mulaguzi Ido ku Yeroboamu mwana wa Nebati? 30 Solomono angatile baIsraeli bansania myaka makumi manazi mu Yerusalema. 31 Nu Solomono akule nu ayikilwe mu mwino wa Davidi; Rehoboamu mwana wage angatile mu kiziki kyage.