Kwangata kwa Rehoboamu
10
1 Rehoboamu endile ku Sekemu kubuno baIsraeli bansania bavule ku Sekemu kumubika ga kisumbi kya bukota. 2 Gongule Yeroboamu, mwana wa Nebati, ku bubo, atukile ku Misri kwabezaga atina mukota Solomono. 3 Basingile bantu kumumana. Ububo Yeroboamu nu baIsraeli bansania bavule ku Rehoboamu nu bamutendile bunee: 4 “So akitile mizigo minene kutuli, nu uwe tukokolele ku bubibu bwa milimo zatukasile so, nu twakukitile.” 5 Nu abakwide bunee: “Vwazi lingo kundi kumbusa kwa bindi bisatu.” Ububo bantu bendile kwabo. 6 Nu mukota Rehoboamu akalile lwango na bakazi ba nango bakitaga gamozi n'isi, gabezaga isi ntekua, nu ababuzizie bunee: “Lwango lukizi lwakwakula bantu babano?” 7 Bamwakwide bunee: “Ndi watunda kuba musoga nu kubatananizia nu kutenda moki masoga kubeli, nti babe bakiti bobe ku milyalya.” 8 Tondo asigile lwango lwamukasile bakulu nu akalile lwango na basikila bakulile gamozi nage nu bendaga nabo. 9 Nu ababuzizie bunee: “Lwango lweinyu lwabe lukizi ku bantu babano bambuzizie bunee: ‘Kokola ku muzigo watubikide so?’” 10 Nu basikila bakulile nage bamwakwide bunee: “Tenda ku babo babwide bunee: ‘So atukitide muzigo munene nu uwe tukokolele kugo,’ ubabule bunee: ‘Munue wa kansingwa kane guli munene kutinga kibunda kya tatane. 11 Ndi tatane amubikide muzigo munene tondo nu nne natalikile kugo; ndi tatane amusungizie na kasusula nu nne tondo namusungie na nkutu.’” 12 Ububo Yeroboamu nu bantu bansania bavule ku Rehoboamu busi bw'isatu anga bwatendile mukota bunee: “Vwazi lingo kundi busi bw'isatu.” 13 Nu mukota abakwide na bongoa nu asigile lwango lwa bakulu. 14 Mukota Rehoboamu abatendile anga bwabezaga lwango lwa basikila. Ababwide bunee: “Ndi tatane amukitide muzigo munene nu nne tondo natalikile kugo. Ndi tatane amusungizie na tususula nu nne tondo namusungie na nkutu.” 15 Ububo mukota ntongwilide bantu, kubuno bwatukile ku Kalaga buno Yehowa azindilizie idagi lyage lyatendile mu kanua ka Ahiya wa Siloni ku Yeroboamu, mwana wa Nebati.
16 Nu gamonine baIsraeli bansania buno mukota ntabongwilide, bantu bakwide mukota bunee:
“Tuli na kikizi mu Davidi;
Tatuli na bwiyani bwampa mu mwana wa Yese.
BaIsraeli, subyazi muntu na muntu ku numba zage.
Davidi, kano kaluma langa numba zobe uwenyene.”
Ububo baIsraeli bansania basubizie nawe nawe ku numba zage. 17 Tondo Rehoboamu angatile baIsraeli beikalaga mu miino za Yuda. 18 Kumbusa, mukota Rehoboamu asingile Hadoramu wabezaga muligia wa kodi, nu baIsraeli bamwisile makozi, nu akule. Mukota Rehoboamu asasizie kwingila mu kayanga kage nu atinine ku Yerusalema. 19 Ububo baIsraeli beitikizye mu numba za Davidi aaba nu lelo.