Rehoboamu akwangata baYuda
11
1 Gabasile Rehoboamu ku Yerusalema, akundamanizie ku kikanga kya Yuda nu ku kikanga kya Benjamina mapuka tununu lukama nu makumi kinana (180.000) masombwedwe ku bita buno beitane na baIsraeli nu kusubya bukota bubuno ku Rehoboamu. 2 Tondo iyuki lya Yehowa lyavule ku Semaya, muntu wa Kalaga, lyatendile bunee: 3 “Tenda ku Rehoboamu, mwana wa Solomono nu mukota wa Yuda nu ku baIsraeli bansania beli mu Yuda nu mu Benjamina bunee: 4 ‘Bubuno u bwatenda Yehowa bunee: “Tamwende kwitana na mibuto zeinyu. Subyazi, nawe nawe ku numba zage kubuno nakitile kitondo kikino.”’” Ububo banzile iyuki lya Yehowa, nu basubizie, nu tabendile kwitana lingo na Yeroboamu. 5 Rehoboamu eikede mu Yerusalema nu obakile miino na mikolo mu Yuda. 6 Nu obakile Betelehemu, nu Etamu, nu Tekoa, 7 nu Beti-Suri, nu Soko, nu Adulamu, 8 nu Gati, nu Maresa, nu Zifu, 9 nu Adoraimu, nu Lakisi, nu Azeka, 10 nu Zora, nu Ayaloni, nu Hebroni, miino zili na mikolo mu Yuda nu Benjamina. 11 Akitile miino zezo na mikolo, buno zibe na magala nu abikile bakota ba bakoloboyo muzo, nu bigenge by'idia nu makiti nu maku. 12 Nu abikile ngabo, nu masumo, mu miino insania nu azigugumanizie. Yuda nu Benjamina zabezaga ku lulenge lwage.
13 Basankoga nu baLawi babezaga munkatini mwa baIsraeli bavule kweli kutuka ku biziki byabo. 14 BaLawi basigile masoa mabo nu numba zabo nu bavule ku Yuda nu ku Yerusalema, kubuno Yeroboamu nu bana bage tababazigide kukitila Yehowa mulimo wabo wa busankoga. 15 Nu Yeroboamu asombwede basankoga bage ba biziki byasakama, nu asombwede bango kukitila basumbu nu byana bya ngombe byakitile. 16 Nu babo beidangizie mu mitima zabo kulonda Yehowa, Kalaga wa baIsraeli, batukile mu bikanga binsania bya baIsraeli, kuvwa ku Yerusalema kukita tuyulo ku Yehowa, Kalaga wa beisibo. 17 Balindizie bukota bwa Yuda nu bakokomezizie Rehoboamu, mwana wa Solomono, myaka isatu kubuno atabangile myaka isatu mu lukita lwa Davidi nu lwa Solomono.
18 Rehoboamu asongile Mahati, mukinga wa Yerimoti, mwana wa Davidi nu wa Abihaili mukinga wa Eliabu, mwana wa Yese. 19 Nu amubutide bana: Yeusi, Semaria nu Zahamu. 20 Nu kumbusa, asongile Maka, mukinga wa Abusaloma, wamubutide Abiya, nu Atai, nu Siza, nu Selomiti. 21 Rehoboamu atundile Maka wa Abusaloma kutinga bakikulu bage bansania nu tulemba twage tunsania. Asongile bakikulu ikumi nu kinana nu abezaga na tulemba makumi mutuba, nu abutile basikila makumi mabili nu kinana nu bakinga makumi mutuba. 22 Rehoboamu asombwede Abiya mwana wa Maka kuba mwiyani wage mutangi munkatini mwa mibuto zage, kubuno asombwede kumubika ga kisumbi kya bukota. 23 Akitile na menge nu kubalangania bana bage ku biziki binsania bya Yuda nu bya Benjamina, ku miino insania zabezaga na mikolo. Abakasile malia meingi makuka, nu abalondede bakikulu beingi.