Sisaki eitenne na Rehoboamu
12
1 Gabede bukota bwa Rehoboamu bwagugumana nu kuba na magala, asigile milembe za Yehowa, we nu baIsraeli bansania. 2 Ku mwaka w'itano wa mukota Rehoboamu, Sisaki, mukota wa Misri, avule kwitana na Yerusalema kubuno baIsraeli bagide Yehowa. 3 Sisaki abezaga na tuyanga kanunu nu nkama ibili (1.200) nu bakwenda ga mpunda tununu makumi mutuba (60.000), nu bantu batanaganzwa, kutuka ku Misri, bavule nage gamozi, baLubimu, baSuki nu baEtiopia. 4 Nu akindile miino zabezaga na mikolo za baYuda nu avule aaba nu ku Yerusalema. 5 Kumbusa, Semaya, mulengania, avule ku Rehoboamu nu ku bakota ba Yuda bakundamenne ku Yerusalema ku kabamba ka Sisaki nu ababwide bunee: “Bubuno u bwatenda Yehowa bunee: ‘Mwansigile, ububo namusigile nu nne mu maboko ma Sisaki.’” 6 Mu nkungu zezo, bakota ba Israeli nu mukota Rehoboamu beibotezie nu batendile bunee: “Yehowa eisanana!” 7 Gamonine Yehowa buno beibotya, iyuki lya Yehowa lyavule ku Semaya nu lyatendile bunee: “Beibotya, ububo nsyabazikye lingo, tondo nabonie nu bongoa bwane tabwabe ku Yerusalema ku maboko ma Sisaki. 8 Tondo babe bakiti bage buno bamenye bwa kunkitila nu bwa kukitila bingo bisi.”
9 Ububo Sisaki, mukota wa Misri, avule ku Yerusalema nu atikizye bikulo binsania bya numba za Yehowa nu bya numba za mukota; atikizye binsania. Nu atikizye ngabo za olo zakitile Solomono. 10 Nu mukota Rehoboamu akitile mu biziki byazo, ngabo za nsubi nu azibikile ku bukungi bwa bakota ba balangi balangaga lwibi lwa numba za mukota. 11 Nu mambizi mansania mavule mukota mu numba za Yehowa balangi bavule nazo nu bazisubizie ku kiziki kya balangi. 12 Geibotezie Rehoboamu, bongoa bwa Yehowa bwatukile kweli nu ntamuzikizye nunsania, tondo kwabezaga lingo bingo bitondo bisoga mu Yuda.
13 Ububo mukota Rehoboamu abede na magala mu Yerusalema nu angatile. Rehoboamu abede na myaka makumi manazi nu umozi gaalingile kwangata nu angatile myaka ikumi nu mutubakamo mu Yerusalema, mwino wasombwedwe na Yehowa ku bikanga binsania bya baIsraeli buno abike izina lyage mugo. Izina lya nina lyamaninwe Nama muAmoni. 14 Nu akitile bubi kubuno ntalangizie mutima wage kulonda Yehowa. 15 Nu makitilo ma Rehoboamu, kutukila itangi aaba nu izinda, ndi tamasanzilwe mu mikanda za mulengania Semaya nu mulaguzi Ido? Kwabezaga bita bindi binsania gasamba Rehoboamu nu Yeroboamu. 16 Nu Rehoboamu akule nu ayikilwe mu mwino wa Davidi nu Abiya mwana wage angatile ga kiziki kyage.