Kwangata kwa Abiya
13
1 Ku mwaka w'ikumi nu kinana wa kwangata kwa mukota Yeroboamu, Abiya alingile kwangata baYuda. 2 Angatile myaka isatu mu Yerusalema. Izina lya nina lyabezaga Mikaya, mukinga wa Urieli wa ku Gibea. Bita byabezaga gasamba Abiya nu Yeroboamu. 3 Abiya endile ku bita na bakoloboyo beizi kwitana tununu makumi manazi (40.000), basombwedwe, nu Yeroboamu avule kweli ku bita na tununu makumi kinana (80.000), mapuka ma bita. 4 Nkungu zezo, Abiya emenne gantata ga mwiduko wa Zemaraimu ku kiziki kya mwiduko wa Efuraimu nu atendile bunee: “Yeroboamu nu baIsraeli bansania, nnungwililazi. 5 Ndi tamwizi buno Yehowa, Kalaga wa baIsraeli, akasile bukota bwa Israeli ku Davidi nu ku bana bage ku milyalya ku idagano litanakua? 6 Tondo Yeroboamu, mwana wa Nebati, mukiti wa Solomono, mwana wa Davidi azanzukile nu agunine mukota wage. 7 Nu bantu ba buliabulia, nu migazanga, bakundamenne nage nu bakindile Rehoboamu, mwana wa Solomono, gabezaga Rehoboamu eikili musikila, ntabezaga na magala nu ntavwamine kubakinda. 8 Nu kano kaluma, mukukengela kukinda bukota bwa Yehowa buli mu maboko ma bana ba Davidi, buno muli kibombo kinene nu muli na byana bya ngombe bya olo gamozi n'inyu, byamukitide Yeroboamu buno bibe tulaga. 9 Ndi tamwapumbizie basankoga ba Yehowa, bana ba Haruni nu ba Lawi, nu mwabikile bantu ba bingo bikanga anga basankoga? Unsania wavwaga kwiyengia na mulume wa kyana kya ngombe nu bilimba mutuba kamo bya mikoko, abede sankoga wa bibyo biteli tulaga. 10 Tondo kutuli, Yehowa eli Kalaga weitu nu tatwamusigile. Tuli na basankoga beli bana ba Haruni, nu baLawi bakukitilaga Yehowa. 11 Nindunindu nu igolo, bakukasana tuyulo twa kugisibwa na bulago ku Yehowa. Bakubika tumpampa twa bindi binsania ga kasenga ka olo nsoga nu bakubangia tusuku n'igolo n'igolo ga byanikilo byato, kubuno tukulanga makakizio ma Yehowa, Kalaga weitu, buno masane igolo n'igolo. Tondo inyuwe mwamusigile. 12 Tamukumona, Kalaga eli gamozi n'iswe, akutusondelezia nu basankoga bage na myonze zabo za kutumana ku bita, kwitana n'inyuwe. Ee baIsraeli, tamwitane na Yehowa, Kalaga wa basoinyuwe, kubuno tamwakinde.” 13 Yeroboamu abikile kakala kumbusa kwabo. Ububo bakoloboyo babezaga lwabusio lwa Yuda; bamozi lwabusio lwabo nu bango kumbusa kwabo. 14 Galolile baYuda, bamonine bita byabezaga lwabusio lwabo nu kumbusa kwabo, nu balilile ku Yehowa nu basankoga bidile myonze zabo. 15 Mu nkungu zezo, baYuda balalukile mu bita nu gabalalukile, Kalaga akindile Yeroboamu nu baIsraeli bansania lwabusio lwa Abiya nu baYuda. 16 BaIsraeli batinine lwabusio lwa baYuda. Kalaga abakasenne mu maboko mabo. 17 Abiya nu bantu bage babeitile beingi, babazikizye baIsraeli tununu nkama itano (500.000). 18 Ububo baIsraeli bakindilwe mu nkungu zezo nu baYuda bakindile kubuno balemaninne Yehowa, Kalaga wa beisibo. 19 Abiya ayangile Yeroboamu nu amunyagile miino: Beteli, Yesana, Efuraimu nu miino zazo mikeke. 20 Yeroboamu ntamonine magala mage mu bindi bya Abiya. Yehowa amulibwide nu akule. 21 Tondo Abiya abede na magala manene. Asongile bakikulu ikumi nu banazi nu abutile basikila makumi mabili nu babili nu bakinga ikumi nu babili. 22 Mango makitilo ma Abiya na misako zage nu moki mage, masanzilwe mu kazeni ka mulengania Ido.