14
1 Ububo Abiya akule nu bamuyikile mu mwino wa Davidi nu Asa, mwana wage, angatile mu kiziki kyage. Mu bindi byage, kisi kyabobelede myaka ikumi. Kwangata kwa Asa
2 Asa akitile busoga nu bwisanana ku meiso ma Yehowa, Kalaga wage. 3 Atikizye tusenga twa tulaga tugeni nu biziki byasakama. Abungwide nkisi nu tulimu nu agusizie mango nu asindile maAshera. 4 Nu akakizizie baYuda kulonda Yehowa, Kalaga wa beisibo, nu kulanga milembe nu makakizio mage. 5 Lingo atikizye ku miino insania za baYuda biziki byasakama nu tusenga twa kugisia bulago, nu bukota bwabobelede mu nkungu zage. 6 Nu obakile miino na mikolo mu Yuda kubuno kisi kyabezaga na bubobelelo. Ntabezaga na bita bindi bibyo kubuno Yehowa amukasile bubobelelo. 7 Abwide baYuda bunee: “Tobake miino zeno nu tuzitimbe na mikolo na numba za byindo nu nibi na bilimba. Kisi kikili kyeitu kubuno twalondile Yehowa, Kalaga weitu; twamulondile nu atukasile bubobelelo ku ndenge insania.” Ububo bobakile nu babobelede. 8 Nu Asa abede na bakoloboyo ba Yuda, tununu nkama isatu (300.000) babezaga na ngabo nu masumo nu ba Benjamina tununu nkama ibili nu makumi kinana (280.000) bekile ngabo nu mankanda. Bo bansania babezaga mapuka ma bita.
9 Zera wa Etiopia amuvwilide ku bita na bakoloboyo kanunu ka kanunu (1.000.000) nu tuyanga nkama isatu nu avule aaba nu ku Maresa. 10 Asa endile kukulumana nage nu balongekile bita mu kibitabita kya Zefata, bwigi na Maresa. 11 Nu Asa alilile ku Yehowa, Kalaga wage, bunee: “Ee, Yehowa, takuli ungo wizi kutukasia kutinga uwe, kukasia na beingi aba na babo beteli na magala: ee Yehowa, Kalaga weitu, tukasie kubuno tukukulemanina, nu twavule ku kibombo kikino kinene ku izina lyobe. Ee Yehowa, uli Kalaga weitu, ntuzige bantu kukukinda.”
12 Ububo Yehowa akindile baEtiopia lwabusio lwa Asa nu baYuda nu baBenjamina, nu baEtiopia batinine. 13 Asa nu bantu baabezaga nabo babayangile aaba nu ku Gerari, nu baEtiopia bakule aaba nu ta wampa wonine, kubuno bazikizibwe na Yehowa nu na bakoloboyo bage. Asa nu bantu bage bekile ntiko ningi nunse. 14 Nu bakindile miino insania zabezaga bwigi na Gerari, kubuno boba bwa Yehowa bwabezaga kubeli; banyagile miino insania kubuno kwabezaga ntiko ningi muzo. 15 Bakindile mikumba za bituganwa nu bendile na mikoko ningi nu ngamia nu kumbusa basubizie ku Yerusalema.