Bulengania bwa Azaria
15
1 Muuza wa Kalaga wabasile ku Azaria, mwana wa Obedi. 2 Nu Azaria endile kusekela Asa nu amubwide bunee: “Asa nu baYuda bansania nu baBenjamina bansania, nnungwililazi. Yehowa eli gamozi n'inyu nkungu zimuli nage. Ndi mukumulonda nti amoneke kumuli, tondo ndi mwamusiga nti amusige. 3 Bindi byingi baIsraeli tababezaga na Kalaga wa bulili geteli sankoga wa kwigisia, aba tababezaga na milembe. 4 Gabagalukile ku Yehowa, Kalaga wa baIsraeli, ku kabamba ka tubebe twabo, nu kumulonda, amonekile kubeli. 5 Mu bindi bibino takwabezaga bubobelelo ku babo bakitaga milimo zabo. Nu kisi kinsania kyabezaga na tubebe twingi. 6 Kwabezaga bita ku kilongo na kilongo nu ku mwino na mwino, kubuno Kalaga abeitizie na tubebe tunsania. 7 Ububo mube na magala nu tamukutwe, kubuno mwabe na lukalilo ku milimo zeinyu.” 8 Gongule Asa ku moki mamo nu ku bulengania bwa Obedi, eikokomezizie kutikya nkisi mbi insania ku kisi kya Yuda nu kya Benjamina kinsania nu ku miino insania zaakindile ku miduko za Efuraimu. Nu obakile lingo kasenga ka Yehowa kabezaga lwabusio lwa numba za Yehowa. 9 Mu nkungu zezo, akundamanizie baYuda bansania nu baBenjamina nu bageni babezaga munkatini mwabo, baEfuraimu nu baManase nu baSimeoni. Bantu beingi batukile ku Israeli unsania nu bavule kweli gabamonine buno Yehowa, Kalaga wage, eli gamozi nage. 10 Ububo bakundamenne ku Yerusalema ku mwezi w'isatu ku mwaka w'ikumi n'itano wa kwangata kwa Asa. 11 Mu busi bubo bakitile kayulo ku Yehowa, ngombe nkama mutubakamo nu mikoko tununu mutubakamo (7.000). Bibyo byabezaga kyindi kya ntiko zibakatile ku bita. 12 Nu balagile idagano ku Yehowa, Kalaga wa beisibo, buno bamulonde na mitima zabo insania nu makengelo mansania. 13 Nu unsania utaziga kulonda Yehowa, Kalaga wa Israeli, atunganana kwitwa ndi eli munene aba mukeke, ndi eli mukikulu aba wamulume. 14 Balagile Yehowa n'iyuki inene, lya mbogimbogi nu na myonze nu mpanda. 15 BaYuda bansania babogilebogile n'idagano lilyo, kubuno bamulagile na mitima zabo insania nu balondile n'ikengelo limozi, nu We amonekile kubeli. Ububo Yehowa abakasile bubobelelo ku ndenge insania.
16 Nu lingo mukota Asa atikizye nina Maka buno ntasigale mu kiziki kyage kya mukota wa mukikulu, kubuno akitile nkisi mbi nunse; izina lyazo Ashera. Asa azigusizie nu azibungwide nu kuzigisia mu mpinga za Kiduroni. 17 Mu bindi bibyo, biziki byasakama byakukumbamina nkisi byasigede mu Israeli, tondo Asa wenyene asigede mukatizia ku Yehowa bindi byage binsania. 18 Avule mu numba za Kalaga na nkaso zakasenne isi nu zage za feza, olo nu bituma. 19 Nu takwabezaga bita lingo aaba nu ku mwaka wa makumi masatu nu itano wa kwangata kwa Asa.