Idagano ibi gasamba Aramu nu Asa
16
1 Mu mwaka wa makumi masatu nu mutuba wa kwangata kwa Asa, Basha, mukota wa Israeli, avule ku Yuda nu obakile Rama, kukubizia bantu ba Asa, mukota wa Yuda, buno tababase aba kwingila. 2 Nu Asa atikizye feza nu olo ku sanduku za numba za Yehowa nu za mukota wa kisi nu azisingile ku Beni-Hadadi, mukota wa Aramu, wabezaga ku Damasiki, nu kumubula bunee: 3 “Kube idagano gagusamba na nne anga bwabezaga gasamba so nu tatane. Lola, nakusingila feza nu olo. Ita idagano lyobe na Basha, mukota wa Israeli, buno atuke mu kisi kyane.” 4 Nu Beni-Hadadi ongule lwango lwa mukota Asa nu asingile bakota b'iyombo lyage ku miino za baIsraeli. Bakindile Iyoni, nu Dani, nu Abeli-Maimu nu miino insania za bigenge bya Nafutali. 5 Gamenyine Basha kitondo kikyo, asigile kobaka Rama nu amenkile milimo zage insania. 6 Kumbusa, mukota Asa akundamanizie baYuda bansania kutikya ku Rama, makozi nu mbavu zobakaga na Basha, nu we obakile namo Geba nu Misipa. 7 Mu nkungu zezo, mulaguzi Hanani avule ku Asa, mukota wa baYuda, nu amubwide bunee: “Kubuno walemaninne baAramu nu ntwalemaninne Yehowa, Kalaga wobe, iyombo lya mukota wa Aramu lyatukile ku maboko mobe. 8 Ndi baEtiopia nu baLubimu tababezaga n'iyombo inene, gamozi na tuyanga twingi nu babo bendaga gantata farasi? Tondo Yehowa abakasenne ku maboko mobe, kubuno wamulemaninne. 9 Kubuno meiso ma Yehowa makulola kunsania mu kisi, kwidolesia buno eli na magala ku babo beli na mutima wasililila kweli. Mu kikyo kitondo wakitile bukongolo, nu kutukila kano kaluma, wabe na bita kankanka.”
10 Nu Asa ongedwe mulaguzi nu amubikile mu kikando, kubuno amongedwe bubibu ku kitondo kikino, nu Asa akandikile bantu bamozi mu nkungu zezo. 11 Bitondo bya Asa bya kulinga nu bya kuzinda byasanzilwe mu mukanda wa bakota ba Yuda nu ba Israeli. 12 Nu Asa abede na lusambo ku masindi mage nu lusambo lwabede lunene. Tondo mu lusambo lwage ntalemaninne Yehowa tondo basakizi. 13 Asa akule mu mwaka wa makumi manazi nu umozi wa kwangata kwage, 14 nu bamuyikile mu nsinda zaakitile mu mwino wa Davidi, nu bamubikile ga kiziki kya kitumba kyabezaga na miti nu bulago, nu bakongizie keiya kanene ku kabamba ka kumukutya.