Kwangata kwa Yosafati
17
1 Mwana wage Yosafati angatile mu kiziki kyage. Eikokomezizie ku baIsraeli. 2 Abikile mayombo mu miino insania za Yuda zabezaga na mikolo nu abikile bakoloboyo mu kisi kya Yuda nu mu miino za Efuraimu zakindile isi Asa. 3 Yehowa abezaga gamozi na Yosafati kubuno atabangile mu nzila z'isi Davidi nu ntalondile nkisi za Baali. 4 Alondile Kalaga w'isi nu atabangile mu makakizio mage; ntayangile misako za baIsraeli. 5 Ububo Yehowa alindizie bukota mu maboko mage, nu baYuda bansania bavule na mitulo ku Yosafati, nu abede na bikulo byingi nu luganuno lunene. 6 Mutima wage wabogilebogile mu nzila za Yehowa, nu atikizye biziki byasakama nu nkisi za Ashera ku Yuda. 7 Mu mwaka w'isatu wa kwangata kwage, asingile mitonge zage, Beni-Haili, nu Obadia, nu Zekaria, nu Netaneli, nu Mikaya, kwenda kwigisia mu miino za baYuda. 8 Asingile baLawi, gamozi na Semaya, Netania, nu Zebadia, nu Asaheli, nu Semiramoti, nu Yonatani, nu Adonia, nu Tobia, nu Tobu-Adonia, nu asingile gamozi nabo, basankoga Elisama nu Yoramu. 9 Beigisizie kunsania mu Yuda, nu babezaga na mukanda wa milembe za Yehowa. Bendile ku miino insania za Yuda, nu beigisizie bantu.
10 Boba bwa Yehowa bwabede ku makota mansania matimbile baYuda nu tabakitile bita na Yosafati. 11 BaFilistini bamozi bavule ku Yosafati na mitulo nu kodi za feza. BaArabu nu bo bavule na mikutu za mikoko, tununu mutubakamo nu nkama mutubakamo (7.700), nu bilimba bya mpene tununu mutubakamo nu nkama mutubakamo (7.700). 12 Yosafati itide nunse. Obakile mu Yuda miino zabezaga na mikolo nu miino za bigenge. 13 Akitizie milimo mingi mu miino za Yuda, nu abezaga na mapuka meingi mu Yerusalema.
14 Mamano u maganzo mabo anga buli numba za beisibo. Kwa Yuda, basondelezia ba tununu: Mutangi Adina musondelezia, nu gamozi nage mapuka tununu nkama isatu (300.000); 15 nu wa babili Yehohanani wabezaga na tununu nkama ibili nu makumi kinana (280.000); 16 nu wa basatu Amasia, mwana wa Sikiri wikasenne kukitila Yehowa, nu gamozi nage mapuka tununu nkama ibili (200.000); 17 nu kwa baBenjamina, Eliada muntu wa magala nu gamozi nage tununu nkama ibili (200.000) beiya bunkanda nu ngabo za bita; 18 nu wa babili, Yozabadi gamozi na bantu tununu lukama nu makumi kinana (180.000) babezaga na ngabo. 19 Babano u bakitilaga mukota Yosafati gamozi na babo babikile mukota mu miino insania zabezaga na mikolo ku Yuda.