Artasasta asinga Nehemia ku Yerusalema
2
1 Mu mwezi wa Nisani ku mwaka wa makumi mabili wa mukota Artasasta, gabede maku malusibwa ku mukota, namakatile nu kumukasamo. Aaba kubasa ku busi bubo nsyamonekile na kabebe lwabusio lwa mukota. 2 Mukota ambwide bunee: “Kubuni kilungi kyobe kikulolesia buno uli na kabebe, ntukusamba; nti ta kabebe ka mutima?” Nu nabede na boba bunene, 3 tondo natendile ku mukota bunee: “Mukota alame ku milyalya. Kubuni malanga mane tamanaba na kabebe mu nkungu za mwino muli nsinda za batatane wasambulwa nu nibi zago zagisibwa?”
4 Mukota ambuzizie bunee: “Kikizi kyukutunda?”
Ububo nasegile ku Kalaga wa mwigulu, 5 nu nakwide mukota bunee: “Ndi bwatananizia mukota nu ndi wakwila mukiti wobe kyombo, nti wankasa bwangato bwa kwenda ku Yuda ku mwino muli nsinda za batatane buno nigobake lingo.”
6 Mukota nu mukikulu wage beikede gamozi, ambuzizie bunee: “Lugendo lwobe lwabe bindi binga? Nu wasubye nkungu nkizi?” Namutendile bindi nu nkungu, nu eitabizizie kunsinga.
7 Nasegile mukota bunee: “Ndi mukota atunda nti ankasa mukanda wa bakota ba kisi kya lisilya lya Luuzi Furati, buno beitabizie nitinge nu kubasa ku Yuda. 8 Lingo, nkusega mukanda kuli Asafu mulangi wa lubanda lwa mukota buno ankase miti za mbavu ku numba za Kalaga nu mukolo wa mwino nu ku numba zane.” Nu mukota eitabizizie binasegile, kubuno Kalaga wane ankasile mponga. 9 Ganabasile ku bakota ba lisilya lya Luuzi, nabasizie mikanda za mukota. Mukota asingile bakota ba mayombo nu babo bakwenda gantata ga farasi gamozi na nne.
10 Nu gabede Sanibalati Muhori, nu Tobia muAmoni mukiti, bongwa ku musagu wozo, babede na bongoa, kubuno kwavule muntu ukutunda kukitila baIsraeli busoga.
11 Ububo nabasile ku Yerusalema nu nikede gago bindi bisatu. 12 Nazanzukile mu kindi gamozi na bantu bakeke, nsyatendile muntu wampa mulimo wozo watendile Kalaga wane nikite ku Yerusalema; takwabezaga engo nyama, umpanga farasi zane. 13 Natukile mu kindi ku Mwingilo wa Mpinga, kubasa ku Mwingilo wa Kanuabalongo ka Kimena nu ku Mwingilo wa ku Iyala; nalolile ku mikolo za Yerusalema zasambukile nu nibi zagisizibwe. 14 Nendile ku Mwingilo wa Kanuabalongo nu Kiziba kya Mukota; takwabezaga nzila za kutinga ga farasi zane. 15 Nu nasubizie mu kindi mu mpinga nu kulola bitutu nu kwingila lingo mu Mwingilo wa Mpinga. 16 Nu bakota tabamenyine kunendile, aba kikizi kinakitaga. Nu nsyatendile baYuda, aba basankoga, aba bakulu nu bangati, aba bango bakukita mulimo wozo.
Nehemia atenda bangati makengelo mage
17 Kumbusa nabatendile bunee: “Tamukumona ku tubebe tweitu buno Yerusalema guse bukindu nu nibi zagisizibwe; vwazi twobake lingo bitutu bya Yerusalema buno tatube na nsoni.” 18 Nabasambalide busoga bwankitide Kalaga wane nu moki mambwide mukota.
Batendile bunee: “Tuzanzuke nu twobake.” Ububo maboko mabo mabede na magala kukita mulimo musoga. 19 Tondo gongule Sanibalati Muhori, nu Tobia muAmoni mukiti, nu Gesemi muArabu ku bubo, batusekile nu kutunyega nu kutubuzia bunee: “Kikizi kimukukita? Mukubenga mukota.”
20 Tondo nabakwide bunee: “Kalaga wa kwigulu atukase mponga, nu beiswe bakiti bage twalinga kobaka, tondo inyuwe, tamuli na kena, aba bwangato, aba kakengelezio mu Yerusalema.”