Meina ma bobaki
3
1 Eliasibu sankoga munene, avule gamozi na mibuto zage babezaga basankoga; bobakile mwingilo wa mikoko, bawimikile nu kuwengia gamozi na nibi zabo, nu bobakile aaba ku Numba za Byindo za Hamea, nu bazengezie, aaba nu ku Numba za Hananeli. 2 Bantu ba ku Yeriko bobakile bwigi nabo, Zakuri mwana wa Imuri obakile nu we bwigi nabo. 3 Bana ba Hasena bobakile mwingilo wa Byena. Babikile miti nu kwimika nibi zago, nu byuma byago aba nu mungolo wa lwibi. 4 Bwigi nabo Meremoti mwana wa Uria, mwana wa Hakosi obakile. Bwigi nabo Mesulamu mwana wa Berekia, mwana wa Mesezabeli obakile; bwigi nabo Zadoki mwana wa Bana obakile lingo. 5 Bwigi nabo bamulume ba ku Tekoa bobakile, tondo bakulu babo tabazigile kwitabizia lwango lwa Kalaga wabo. 6 Yoyada mwana wa Pasea nu Mesulamu mwana wa Besodia bobakile mwingilo wa Yeshana na miti zago, nu kwimika nibi nu byuma aaba nu mungolo wazo. 7 Melatia muGibeoni obakile bwigi nabo, nu Yadoni wa ku Meronoti, bantu ba Gibeoni, nu ba Misipa, ba kisumbi kya mukota wa ku lisilya lya Luuzi Furati. 8 Bwigi nage, Uzieli mwana wa Harihaya, mutumbi wa nsubi obakile nu we. Bwigi nage, Hanania umozi wa bakiti ba bulago bwa nsunu obakile nu we, nu bobakile Yerusalema na komanizia nu magala manene nu kubika kitutu kinene nunse. 9 Bwigi nabo, Refaya mwana wa Huri, mukota wa kyindi kya Yerusalema obakile nu we kuko. 10 Yedaya mwana wa Harumafu, obakile bwigi nabo, nu bwigi na numba zage, Hatusi mwana wa Hasabunia, obakile nu we. 11 Malkiya mwana wa Harimu, nu Hasubu mwana wa Pahati-Moabu bobakile kingo kyindi na numba nnene za kyindo kya meiko. 12 Salumu mwana wa Halohesi, mwangati wa kyindi kya Yerusalema, obakile bwigi nage gamozi na bakinga bage. 13 Hanuni nu beiya Zanoa, bobakile Mwingilo wa Mpinga; bawobakile nu kubika nibi nu byuma na kubika mungolo wazo, nu mabusu kanunu ma kitutu aaba nu kubasa ku Mwingilo wa ku Iyala. 14 Malkiya mwana wa Rekabu mwangati wa Beti-Hakeremu obakile Mwingilo wa ku Iyala nu kubika nibi zago nu byuma byago nu kubika mungolo wazo. 15 Nu Salumu mwana wa Koli-Hoze mwangati wa kibe kya Misipa obakile Mwingilo wa Kanuabalongo; awobakile nu kubika nibi zago na byuma nu mingolo zazo; obakile kitutu kya Kiziba kya Siloamu, bwigi n'isoa lya mukota aaba nu ku byindo bikugela kutuka ku mwino wa Davidi. 16 Kumbusa kwage, Nehemia mwana wa Azibuku, mwangati wa Beti-Suri, obakile aaba nu ku kiziki kyalolelana na nsinda za Davidi, kubasa ku kiziba kyakitilwe, aaba nu ku Numba za Mapuka. 17 BaLawi bobakile kumbusa kwage, nu Rehumu mwana wa Bani abezaga musondelezia wabo. Bwigi nage Hasabia mwangati wa kyindi kya Keila obakile ku lulenge lwa kisi kyage. 18 Bawayi mwana wa Henadadi mwangati wa kingo kyindi kya Keila obakile kumbusa kwage. 19 Bwigi nage Ezeri, mwana wa Yesua mwangati wa Misipa, obakile ku kingo kyindi kyalolelana byindo bya numba za kulanga ngabo aaba nu ku kapindapinda. 20 Baruku mwana wa Zabayi obakile kumbusa kwage na komanizia nunse, kutukila kapindapinda lwa kitutu aaba nu ku mwingilo wa numba za sankoga munene Eliasibu.
21 Meremoti mwana wa Uria, mwana wa Hakosi obakile ku lungo lulenge bwigi nage, kutukila ku lwibi lwa numba za Eliasibu aaba nu kuzinda kwa numba zage. 22 Kumbusa kwage u kobakile basankoga ba kikyo kisi. 23 Benjamina nu Hasubu bobakile lwabusio lwa numba zabo. Nu kumbusa kwabo Azaria mwana wa Maseya mwana wa Anania obakile ku lulenge lwa numba zage wenyene. 24 Binui mwana wa Henadadi obakile ku lungo lulenge, kutukila ku numba za Azaria aaba nu ku kingo kitumba, nu kubasa ku kapindapinda. 25 Palali mwana wa Uzayi obakile nu we ku kiziki kyalolela ku kitutu, aaba nu gabasila kyindo kya numba za mukota, kili bwigi na numba za balangi. Pedaya mwana wa Parosi obakile nu we. 26 Bakiti ba Numba za kukumbamina beikede ku Ofeli bobakile ku kiziki kikulolana na Mwingilo wa Mazi guli ku lulenge lwa kukutukaga kisongo kya busi, aaba nu ku numba za byindo zikutuka mu kitutu. 27 Kumbusa kwage ba ku Tekoa bobakile butunganana na numba zasakama za byindo, zili gantata ga kitutu aaba nu ku kitutu kya Ofeli.
28 Basankoga bobakile kuntata kwa mwingilo wa farasi, nawe nawe na wobakile kulolela ku numba zage. 29 Kumbusa kwabo u kobakile Zadoki mwana wa Imeri kitutu kyalolelana na numba zage. Nu Semaya mwana wa Sekania, mulangi wa Mwingilo wa Kuntata, obakile. 30 Kumbusa kwage Hanania mwana wa Selemia, nu Hanuni mwana wa mutuba wa Zalafi bobakile kingo kyindi. Mesulamu mwana wa Berekia obakile ku lulenge lwabusio lwa numba zage. 31 Malkiya umozi wa batumbi ba olo obakile bwigi nage aaba nu ku numba za bakiti ba Numba za Kukumbamina, nu za bakunzia ba ku lulenge lwa Mwingilo wa Kulola ku Bageni, aaba nu ku busio bwa kwigulu ga kapindapinda. 32 Batumbi ba olo nu bakunzia bobakile kutukila ga kapindapinda aaba nu ku bubo busio bwa kwigulu nu Mwingilo wa Mikoko.