Beiti bageleka kumenkya mulimo wa Yerusalema
4
1 Gongule Sanibalati buno tuse tobaka bitutu, ongilwe nu asekile baYuda. 2 Atendile lwabusio lwa banyage nu lwa mayombo ma Samaria bunee: “Babo baYuda basosu bakukita kikizi? Ndi bakulumizie mukolo lingo? Ndi bakasane tuyulo? Ndi basile mu busi bumozi? Ndi bamone makozi mu mala masilile kugia?” 3 Tobia muAmoni wabezaga gamozi nage atendile bunee: “Kilo, banobaka ndi musimba wabakama nu kusindika, nti kitutu kyongo kya makozi kyenduka!” 4 Tungwilile, ee Kalaga weitu, kubuno twanyegwa. Subya bilingano byabo gantata ga matoe mabo; siga bakatwe mu kisi kya bukobe. 5 Ntusigilile mibi zabo aba kuzimia bwagi bwabo lwabusio lwobe, kubuno bakongezie lwabusio lwa bobaki. 6 Twakulumanizie kitutu kunsania, tugu kyindi kya kuntata kyasigede, kubuno bantu bakokomezizie kukita mulimo.
7 Tondo Sanibalati nu Tobia nu baArabu nu baAmoni nu baAsidodi bongilwe bubibu gabongule buno mikolo za Yerusalema zise zakulumanibwa insania, 8 bakalile lwango buno bavwe kukita bita na baYerusalema nu kulusia mulubu mumo. 9 Tondo twasegile ku Kalaga weitu nu twabikile balangi ku kabamba kabo musi nu kindi. 10 Tondo baYuda batendile bunee: “Bakiti bakweka mizigo bese bakutwa, kuli mala meingi nu tatukuvwama kobaka mikolo lingo tubenyene.”
11 Beiti beitu batendile bunee: “Tabamenye, aba kumona aaba nu twabase munkatini mwabo nu kubeita buno mulimo ulekelwe.” 12 Nu baYuda bansania beikede bwigi nabo bavule nu batutendile mambizi ikumi bunee: “Ku biziki binsania bitwendage, basubizie kutuli.”
13 Nabikile bantu mu bikanga mu biziki bisoga bwigi na kitutu na myene zabo za nganda nu masumo nu misungu. 14 Nalolile ku binsania, nu kumbusa nazanzukile nu kutenda ku bakulu nu bangati nu bango bansania bunee: “Tamubakue boba. Kengelazi Yehowa Munene, nu ukukubwa boba. Itanazi nabo ku kabamba ka mibuto zeinyu, nu bana beinyu, nu bakikulu beinyu, nu numba zeinyu.” 15 Gongule beiti beitu buno twamenya bulongeki bwabo bunsania, nu Kalaga weitu akindile lwango lwabo, twasubizie beiswe bansania ku mulimo wa mikolo nawe ku mulimo wage. 16 Kutukila bubo busi, bantu bane bamozi bakitile mulimo, nu bango bakatile masumo nu ngabo nu misungu nu nkanzu za kyuma, nu bangati basondelezizie baYuda kukita mulimo wa mikolo. 17 Babo bobakaga mukolo nu beki ba mizigo, nawe na wakitile mulimo na kuboko kumozi nu kuko kungo kwabezaga kwakata isumo. 18 Nu unsania wakitaga mulimo ekile mwene wage wa nganda mu musagi mu kwaga. Nu wozo widaga monze abezaga bwigi na nne. 19 Natendile na bakulu nu bangati nu bango bantu bunee: “Mulimo guli mwingi nu munene nu twabalanganibwa ga mikolo nawe nawe bulazi na munyage. 20 Kiziki na kiziki kimungwage ku iyuki lya monze, kundamanazi kukyo bwigi n'iswe nu Kalaga weitu atwitanine nabo.”
21 Ububo twakitile mulimo, bamozi na masumo mu maboko kutukila kukya kwa busi aba na ku kumoneka kwa nkeninkeni. 22 Lingo natendile ku bantu bunee: “Na muntu na wikala na bamulume bansania nu mukiti wage mu Yerusalema, batulange mu kindi nu kukita mulimo mu musi.” 23 Nne nu mibuto zane nu bakiti bane nu bantu bandangile tatwatikizye nsulu zeitu, nu na muntu na muntu abezaga na ngabo zage kayikayika ku kuboko kwa seidume aaba ku kutaga mazi.