Nehemia akasia bazambi
5
1 Ububo idilo inene lyabaside bantu nu bakikulu babo ku kabamba ka mibuto zabo baYuda. 2 Kubuno babezaga bantu batendaga bunee: “Iswe nu basikila beitu nu bakinga beitu tuli beingi; tukutunda ngano, tulie nu kulama.” 3 Lingo kwabezaga bango batendile bunee: “Twakasile idagano ku masoa meitu nu masoa meitu ma mizabibu, nu numba zeitu tumone ngano ku kabamba ka bindi bya nzala.”
4 Lingo kwabezaga bango batendile bunee: “Twambizie bikulo buno tulige mutulo wa mukota ku masoa meitu nu masoa ma mizabibu. 5 Tondo mibili zeitu zili anga mibili za mibuto zeitu, bana beitu beli anga bana babo; nu lola, twabika basikila beitu nu bakinga beitu mu bukobe, nu kuba bakiti, nu bango bakinga beitu basila kubikwa mu bukobe; nu tatunavwama kukita kampa; kubuno bango bantu beli na masoa meitu nu masoa meitu ma mizabibu.”
6 Nu nne nongilwe nunse ganungule ku idilo lyabo nu bitondo bibino. 7 Ububo nakalile lwango na mutima wane, nendile myango na bakota nu bangati nu kubabula bunee: “Mwekya mibuto zeinyu mizigo mizitu, muntu na muntu mubuto wage.” Nakundamanizie musanganano munene ku kabamba kabo. 8 Nababwide bunee: “Iswe twakulwide mibuto zeitu u baYuda, bakunzilwe ku ba bilongo. Nu inyuwe mukutunda kukunzia mibuto zeinyu, buno iswe tubakunze?” Beikede kibibi, tabavwamine kutenda bwampa.
9 Lingo natendile bunee: “Kitondo kimwakitile takisoga. Ndi tamwatunganana kwenda mu boba bwa Kalaga weitu, ku kabamba ka bilingano bya bilongo bili beiti beitu? 10 Nne nu mibuto zane nu bakiti bane, tukubambya bikulo nu ngano buno bamone mutali. Nkumusega, tusigazi kitondo kikino kya kukata mutali. 11 Namusega lelo mubasubizie masoa mabo, nu masoa mabo ma miti za biguma nu ma mizabibu, nu numba zabo nu kyindi kimozi kya bibili kya bikulo, nu ngano nu mazi ma biguma nu makiti mamwabanyagile.”
12 Ububo batendile bunee: “Twabasubizie aba tatwatunde kena kubeli, twakite anga bubo buwatendile.”
Ububo namanine basankoga, nabalumbizizie buno bakite anga idagano lilino. 13 Natitwide nsulu zane, natendile bunee: “Ububo Kalaga atitule muntu na muntu kutuka ku numba zage, nu kutuka ku mulimo wage utazindilizia idagano lilino; ububo atitulwe nu ntabe na kena.”
Musanganano unsania batendile bunee: “Amina, nu Yehowa asimwe.” Nu bantu bakitile anga idagano lilyo.
Nehemia asomba kumona mutali
14 Lingo, kutukila nkungu zinabikilwe mwangati wabo mu kisi kya Yuda, kutukila mwaka wa makumi mabili aaba nu ku mwaka wa makumi masatu nu ibili wa Artasasta mukota, u myaka ikumi nu ibili, nne nu mibuto zane tatwalide ku idia lya mwangati. 15 Tondo bangati babezaga lwabusio lwane batikizye ku bantu idia nu mazi ma biguma, kutinga byindi makumi manazi bya feza; ububo bakiti babo bangatile bantu, tondo nne nsyakitile bubo ku kabamba ka kukua Kalaga boba. 16 Ububo, nendelede na mulimo wa kitutu kikino nu tatwakunzile bilongo; nu bakiti bane bansania bakundamenne gano kukita mulimo. 17 Lingo ku meza mane kwabezaga bantu lukama lumozi makumi matano ma baYuda nu bangati, kutinga babo bavule kutuli, kutuka ku bilongo byatutimba. 18 Idia lyalongekagwa ku kabamba kane ku busi na busi lyabezaga mulume umozi wa ngombe nu mikoko mutuba nsoga nunse; nu bandongekede nkoko imozi, nu na bindi ikumi na bindi ikumi na milanga za maku ma nkita ningi. Aba bubo nsyatundile idia lya mwangati, kubuno bukobe bwabezaga bunene ku bantu babano. 19 Ee Kalaga wane, nkengele ku busoga ku kabamba ka bitondo binsania binakitide bantu babano.