Bwengelezi bwa beiti
6
1 Gongule Sanibalati nu Tobia, nu Gesemi muArabu nu bango beiti ku musagu buno nobaka mukolo unsania, nu takwasigala itengu limozi, tondo nsyabikile nibi ku mwingilo na mwingilo, 2 Sanibalati nu Gesemi bansingide musagu kummana buno nikundamane nabo ku mwino umozi mu kibitabita kya Ono, tondo lulo lwabezaga lwango lwa kunkitila bubi. 3 Ububo nasingile migenzi kubeli nu kutenda bunee: “Nili na mulimo munene kano kaluma, nsinavwama kugusiga nu kuvwa kumuli. Kubuni mulimo wono gumenkwe gankuvwa kumuli?” 4 Bansingide mugenzi mambizi manazi nu limbizi na limbizi nabakwide bumozi. 5 Limbizi lya matano, Sanibalati asingile mugenzi wage kundi na mukanda wakandulwa ku kuboko kwage. 6 Mumo mwasanzilwe bunee: “Musagu wabalanganibwa mu bilongo binsania nu Gesemi atenda buligo bunee: ‘Uwe nu baYuda mwakala lwango lwa kuguna; ku kabamba kako wobakile mukolo nu lingo uwenyene ukutunda kuba mukota wabo. 7 Nu uwe wabikile balengania kusambala musagu wobe mu Yerusalema bunee: “Kuli mukota mu Yuda.”’ Kano kaluma mukota wa kisi kikino asambalilwe musagu wono. Vwa kano kaluma, tutendanazi bitondo bibino.”
8 Nu nabakwide bunee: “Bubo buwatenda tabwakitilwe, ukubulengania tugu uwenyene.”
9 Bansania bagelekile kutwitia boba na kilemanizio kya buno tunatamba mu mulimo nu tunagusiga. Tondo kano kaluma, ee Kalaga, nkase magala. 10 Busi bumozi nendile ku numba za Semaya, mwana wa Delaya, mwana wa Mehetabeli, kubuno ntavwamaga kutabanga. Atendile bunee: “Tukundamane ku numba nnene za Kalaga, nu kwigala nibi, kubuno banavwa kukwita. Lebelebe mu kindi bakukwita.”
11 Namwakwide bunee: “Ndi muntu anga nne anatina? Ndi muntu anga nne aningila mu numba nnene nu konia kalamo kage? Nsyingile.” 12 Nu nasongolwede buno Kalaga ntamukasile bulongeki bubuno kubuno Tobia nu Sanibalati bamukasile bikulo ku lumbisombiso. 13 Bamusingile anitie boba, buno nikite bwagi nu kuba na lukumu lubi, buno banililike.
14 Ee Kalaga wane, kengela Tobia nu Sanibalati anga bubakitile, nu Noadia mukikulu mulengania, nu bango balengania batundile kunitia boba.
Mukolo wasilile
15 Nu mukolo watozile ku kindi kya makumi mabili nu bitano kya mwezi wa Eluli. a Bindi binsania bya mulimo byabezaga makumi matano nu bibili. 16 Gongule beiti bansania nu bingo bilongo byatutimba ku bubuno, bakule boba nu kutamba. Basongolwede buno mulimo wono wakitilwe ku lutundo lwa Kalaga weitu. 17 Mu bindi bibyo, bakulu ba Yuda basingile mukanda ku Tobia nu Tobia asingile mukanda kubeli. 18 Kubuno beingi mu Yuda balumbilenne nage, kubuno abezaga mukozi wa Sekania, mwana wa Ara, nu Yehohanani mwana wage asongile mukinga wa Mesulamu, mwana wa Berekia. 19 Bamusimine lwabusio lwane nu kumubula moki mane. Tobia ansingide mikanda za kunitia boba.