Lusombo lwa Hamani ku Mordekayi
3
1 Kusila kwa bitondo bibino mukota Ahasuero asakikile Hamani mwana wa Hamedata muAgagi; amusakikile nu kumubika ga kiziki kinene kya bwangato kutinga bango bangati bansania babezaga gamozi nabo. 2 Bangati bansania ba mukota babezaga ga mwingilo wa numba za mukota bakomine mazu gansi lwabusio lwa Hamani nu bamukasile luganuno, kubuno ububo bwakakizizie mukota kweli. Tondo Mordekayi ntakomine mazu aba ntamukasile luganuno. 3 Ububo bakiti ba mukota babo babezaga ga mwingilo wa numba za mukota babuzizie Mordekayi bunee: “Kubuni ukunana ikakizio lya mukota?” 4 Na busi na busi bamubuzagia, tondo ntazigile kukita bubo. Ububo basambalide Hamani kitondo kikyo kumenyinina buno ndi misako za Mordekayi zasigililwe, kubuno abatendile buno eli muYuda. 5 Gamonine Hamani buno Mordekayi ntakomine mazu aba ntalolesizie lwanzo kweli, Hamani abede na bongoa bukali. 6 Tondo gaamenyine buno Mordekayi abezaga muYuda, asombile ikengelo lya kwita Mordekayi wenyenenyene, ububo Hamani alondile nzila za kuzikya baYuda bansania babezaga kunsi kwa bukota bunsania bwa Ahasuero. 7 Ku mwezi mutangi, u mwezi wa Nisani, wa mwaka w'ikumi nu ibili wa mukota Ahasuero, besile Purimu, u mbale, lwabusio lwa Hamani kusombola kindi kikizi nu mwezi mukizi wa kwita baYuda; nu mbale zalolesizie mwezi w'ikumi nu ibili, u mwezi wa Adari.
8 Kumbusa Hamani abwide Mukota Ahasuero bunee: “Kuli kilongo kimozi kyabalanganibwa nu kwandabana munkatini mwa bantu mu miino insania minene za bukota bwobe, nu milembe zabo zengukana na milembe za bingo bilongo, aba tabakwanza milembe za mukota. Ububo takuli mutali ku mukota kwikala lingo nabo. 9 Ndi bwatananizia mukota mulembe usanzwe buno beitwe, nu nne tondo nalige talanta tununu ikumi twa feza mu isuku lya mukota, ku kabamba ka babo bakukita bitondo bibino.”
10 Ububo mukota atikizye lupete lwage lwa kamenyikilo nu alukasile Hamani, mwana wa Hamedata, muAgagi, u mwiti wa baYuda. 11 Nu mukota abwide Hamani bunee: “Feza zili zobe, nu bantu beli bobe; kita nabo anga bwakutananizia.”
12 Ku busi bw'ikumi nu bisatu bwa mwezi mutangi, basanzi ba mukota bamaninwe. Basanzile mu masanzo ma miino minene insania, nu mu mitendezi za kilongo na kilongo, ikakizio lya Hamani ku bangati ba mukota ba miino minene nu ku banene ba bilongo binsania. Ikakizio lyasanzilwe mu izina lya mukota Ahasuero wenyene, nu lyakandilwe na kakengelezio kage ka lupete lwage. 13 Mikanda zasingilwe ku maboko ma basingwa ku miino minene insania za mukota, kubigia baYuda bansania nu kubeita, nu kuzikya basikila nu bakungu, nu bana, nu bakikulu mu kindi kimozi, u kindi ky'ikumi nu bisatu kya mwezi w'ikumi nu ibili u mwezi wa Adari, nu kubatukula bikulo byabo binsania. 14 Lusamba lumozi lw'ikakizio lwasambalwe anga mulembe mu miino insania za babilongo bansania, buno babe kayikayika ku bubo busi. 15 Ku ikakizio lya mukota, lyasambedwe ku Susani, mwino wa mikolo; mukota nu Hamani beikede kunua maku, tondo mwino wa Susani wazangilezangile.