Mordekayi aluta Esteri kukasia
4
1 Gamenyine Mordekayi ku bitondo binsania byakitilwe, atile nsulu zage nu kuvwala nsulu z'ikunino, nu kwibuluga lwito, nu eingide ku mwino gaabezaga akulila na kabebe kakali nunse. 2 Endile ku mwingilo wa mukota umpanga, kubuno muntu unsania wavwala nsulu z'ikunino ntavwamine kwingila ga mwingilo. 3 Mu bibe binsania, mu mwino na mwino mwabasile ikakizio nu mulembe wa mukota, mwabezaga idilo linene lya baYuda gamozi na kwikanda idia, nu kulengelelwa n'idilo, nu beingi bavwalile makunino nu kuzombama mu lwito. 4 Gavule bakiti bakikulu ba Esteri mukazi wa mukota gamozi na mintembele ku Esteri nu kumusolela musagu wa Mordekayi, abede na kabebe kanene. Esteri asingile nsulu nsoga za kuvwala ku kiziki ky'ikunino, tondo nteitabizizie kuzivwala. 5 Kumbusa Esteri amanine Hataki, umozi wa mintembele za mukota waabikile kumukitila, nu amukakizizie kulonda kumenya kabebe ka Mordekayi nu kubuni eli nako. 6 Ububo Hataki endile kuli Mordekayi ga makano manene ma mwino, mabezaga lwabusio lwa mwingilo wa numba za mukota. 7 Mordekayi amusolede binsania byamubaside, aba nu maganzo ma byindi bya feza byalagile Hamani kuliga ku isuku lya mukota ku kabamba ka kuzika kwa baYuda. 8 Lingo amukasile lusamba lumozi lwa masanzo m'ikakizio lya kubazikya, lyasambalwa mu Susani, buno alulolesie kuli Esteri nu kumwisulilalo. Abuzizie Hataki kusengezia Esteri kwenda kuli mukota kumusega mponga nu kusegela bantu bage mponga kweli.
Esteri eli kayikayika kwikasana ku bantu bage
9 Hataki asubizie kuli Esteri nu amusolede binsania byamubwide Mordekayi. 10 Kumbusa Esteri amwigisizie kutenda ku Mordekayi bunee: 11 “Bangati bansania ba mukota nu bantu bansania ba miino zage beizi buno wamulume unsania aba mukikulu ukukunda mukota ga kyage kya numba zage geteli kumanwa na mukota eli na mulembe umozi buno eitwe, umpanga ndi mukota amulambizia musumbo wage wa olo nti alame. Tondo nne kutukila bindi makumi masatu nsyamaninwe buno ningile ku mukota.”
12 Gasambedwe moki ma Esteri kuli Mordekayi, 13 akwide bunee: “Ntukengele buno uwe tugu munkatini mwa baYuda bansania, wonibwe ku kabamba ka buno uli mu numba za mukota. 14 Tondo ndi ukwikala kibibi mu nkungu zeno, nti lonio nu kyombo ku baYuda byatuke ku kingo kiziki mu bukota ku kabamba kakano, tondo uwe nu numba za so mwazike. Nazi wamenya ndi wavule ku kiziki kya mukikulu wa mukota ku kabamba ka nkungu anga zeno?”
15 Ububo Esteri akwide Mordekayi bunee: 16 “Wende ukulumanie baYuda bansania beli ku Susani, nu mwikande kulia ku kabamba kane. Tamulie aba kunua ku bindi bisatu musi nu kindi. Nne nu bakiti bane bakikulu twikande kulia gamozi n'inyu anga bumwakite. Gakwakitwe bubo ningile kuli mukota geteli kwanza mulembe. Nu ndi nakue nti nakue tugu.”
17 Ububo Mordekayi endile nu akitile binsania byamukakizizie Esteri.