Lubuzio lwa Esteri ku mukota
5
1 Ku busi bw'isatu Esteri avwalile nsulu zage za bukota nu emanine ga kibuga kya numba za mukota lwabusio lwa numba nnene za mukota. Mukota abezaga akwikala ga kisumbi kyage kya bukota mu numba za bukota kulolela ku lwibi lwa numba. 2 Gamonine mukota ku Esteri mukazi wage akwemana ga kibuga atananizibwa nage, nu mukota alambizie musumbo wa olo wabezaga ku kuboko kwage. Ububo Esteri amukundile nu eitubizie ku ntonga za musumbo. 3 Nu mukota amubuzizie bunee: “Esteri mukazi wane kikizi kyukutunda? Isego lyobe lili likizi? Aba ndi kyindi kya bukota nakukase kyo.” 4 Esteri akwide mukota bunee: “Ndi bwatananizia mukota, mukota avwe gamozi na Hamani ku kisagulo kinamulongekede.”
5 Mukota atendile bunee: “Tola Hamani kano kaluma buno tukite anga bwasega Esteri.”
Ububo mukota nu Hamani bendile ku kisagulo kyalongekile Esteri. 6 Gababezaga bakunua maku, mukota abuzizie lingo Esteri bunee: “Kano kaluma isego lyobe lili likizi? Walikaswe. Nu kikizi kyukutunda? Aba ndi kyindi kya bukota wakaswe kyo.”
7 Esteri akwide bunee: “Isego lyane nu kikyo kinkutunda kili kikino: 8 ndi mukota ankwila kyombo, nu ndi bwatananizia mukota kungwa ku isego lyane nu kunkasa kikyo kinkusega, nti mukota nu Hamani bavwe lubi ku kisagulo kinabalongekele. Mu nkungu zezo nakite anga bwatendile mukota.”
Bongoa bwa Hamani ku Mordekayi
9 Hamani atukile mu busi bubo na mbogimbogi nnene nu kyelele mu mutima, tondo gamonine Hamani ku Mordekayi ga mwingilo wa numba za mukota, nu amonine buno ntazanzukile nu kugilimina lwabusio lwage ongedwe Mordekayi nunse. 10 Tondo Hamani eikandile nu endile ku numba zage. Akundamanizie bilemba byage gamozi na mukazi wage Zeresi. 11 Hamani eiganwine na bwingi bwa bikulo byage, nu bana bage, nu ku bunsania bwamukasile mukota, nu bwamubikile gantata ga bango bangati bansania nu mitonge. 12 Hamani atalikide kutenda bunee: “Bibino tabili binsania; nne tugu namanwa na Esteri mukazi wa mukota kwenda na mukota ku kisagulo kyakasile. Nu lingo ambuzizie gamozi na mukota ku kisagulo kya lubi. 13 Tondo bibino binsania tabili kena, ndi nikili namona ku wozo Mordekayi, muYuda, ekikala ga mwingilo wa numba za mukota.”
14 Mukazi wage Zeresi, nu bilemba byage binsania byamubwide bunee: “Iyango idazi lya mabusu makumi matano limikwe, nu mu nindunindu sega mukota buno Mordekayi akamwe kulyo. Kumbusa wende gamozi na mukota ku kisagulo nu ubogeboge.” Lwango luluno lwabogeziebogezie Hamani, nu akakizizie buno beimike lilyo iyango.